Bıyl Aqtóbe men Qostanaı arasyndaǵy joldyń 65 shaqyrymy paıdalanýǵa beriledi
Qostanaı oblysynda respýblıkalyq mańyzy bar «Qarabutaq-Komsomolskoe-Denısovka-Rýdnyı-Qostanaı» (389-515 shaqyrym) avtomobıl jolyn qaıta jańartý jalǵasyp jatyr.
«Jalpy uzyndyǵy 114 shaqyrymdyq jol oblystaǵy birqatar eldimekendi baılanystyratyndyqtan, joba oblystyń damýyna zor serpin bermek. Qaıta jańartý jumystary joldyń uzyndyǵy 35 shaqyrymdy quraıtyn Denısovka eldimekeninen Pereleskı eldimekenine deıingi aralyǵyn jáne uzyndyǵy 30 shaqyrymdy quraıtyn Pereleskı eldimekeninen Tobyl stansasyna deıingi aralyǵyn qamtyp, Antonovka, Alchanovka, Valerıanovka eldi mekenderi men Rýdnyı, Lısakovsk qalalary arqyly ótedi», delingen habarlamada.
Qurylys-montajdaý jumysyn «Ivrýs» jáne «ABK-Avtodor NS» JShS júrgizip jatyr.
«Joba aıasynda jol astynan sý ótkizý qubyrlary, jol aıyryǵy, qyzmet kórsetetin pavılony bar demalys alańdary, sonymen qatar, Denısovka eldimekeninde jol paıdalaný basqarmasy jáne Antonovka eldimekeninde jol paıdalaný pýkinti qurylysy qarastyrylǵan», delingen habarlamada.
Bıyl joldyń Tobyl stansasy men Rýdnyı qalasy aralyǵyndaǵy ýchaskelerde tıisti jumys bastaldy. Jol ýchaskeleriniń jalpy uzyndyǵy 49 shaqyrym.
Qaıta jańartý jumystarynan ótken soń 114 shaqyrymdyq jol ýchaskesi 2 jolaǵy bar ІІ tehnıkalyq sanattaǵy jolǵa sáıkestendirilmek. Qozǵalys bóliginiń eni 7,5 metr. Qazirgi tańda joldaǵy jumystarǵa 475 adam men 230 tehnıka jumyldyrylǵan. Nysan 2022 jyly paıdalanýǵa beriledi dep josparlanyp otyr.