Bıyl Aqtaý jáne Quryq porttary arqyly tasymaldanatyn júk 4,8 mln tonnaǵa jetpek
«2020 jyly Aqtaý jáne Quryq teńiz porttary arqyly tasymaldaý kólemi shamamen 4,8 mln tonnany quraıdy. Bul 2019 jyldyń kórsetkishinen 9 paıyzǵa (5,3 mln. tonna) tómen. Bul rette, konteınerler men júk avtokólik quraldaryn aýystyryp tıeýdiń 2 eseden astam óskeni baıqalady», - dedi mınıstrlikten.
Vedomstvo málimetinshe, bıyl Aqtaý porty men Irannyń Amırabad porty arasynda turaqty konteınerlik jeli, sondaı-aq Quryq-Anzalı (Iran) avtoparomdyq qatynasy ashyldy. Qazirgi ýaqytta Aqtaý jáne Túrikmenbashy porttary arasynda konteınerlik qatynas jáne Quryq pen Mahachkala arasynda paromdyq tasymaldar ashý pysyqtalýda.
Aqtaý porty arqyly júk tasymaldaýdyń tartymdylyǵyn arttyrý maqsatynda salyq zańnamasyna temir jol-teńiz qatynasy arqyly júkterdi eksporttaý kezindegi TJ tarıfterine QQS-ty alyp tastaý boıynsha ózgeris engizildi.
Qara teńizge shyǵýdyń jeńildetilgen tártibin qamtamasyz etý úshin Keme qatynasy týraly kelisim ratıfıkatsııalandy. Atap aıtqanda, Reseıdiń ishki sý joldary arqyly tranzıttik ótýge ruqsat alý merzimi 6 aıdan 10 kúnge deıin qysqardy.
Teńiz kóliginde memlekettik qyzmetterdi kórsetýdi jeńildetý maqsatynda osy jyly 4 memlekettik qyzmet boıynsha bıznes-protsester avtomattandyryldy. Sondaı-aq merzimderi men usynylatyn qujattar tizbesi qysqartyldy.
«Nurly jol» memlekettik baǵdarlamasy aıasynda bıyl keme qatynasy shlıýzderin kúrdeli jóndeýdiń birinshi kezeńi aıaqtalyp, aýdany 8,2 myń sharshy metr ýchaskelerindegi temir beton konstrýktsııalaryna jóndeý júrgizildi. 1,9 mlrd teńge ıgerildi.
Bıyl 11 normatıvtik quqyqtyq aktiler qabyldandy. Onyń ishinde mınıstrliktiń 2020 jylǵa arnalǵan NQA jospary aıasynda 1 buıryq bar. Kelesi jyly Aqtaý portyn «Aqtaý teńiz porty» AEA qatysýshylarynyń quramyna qosý jáne port negizinde «konteınerlik hab» qurý máselelerin pysyqtaý josparlanýda. Bul 2025 jylǵa qaraı konteıner aǵynynyń kólemin jylyna 35 myńnan 135 myń konteınerge deıin ulǵaıtýǵa múmkindik beredi.
«Sondaı-aq, kómir, kúkirt, metall ónimderi sııaqty eksporttyq júkter kóleminiń bir bóligin Aqtaý jáne Quryq porttaryna qaıta baǵdarlaý josparlanýda. Alaıda, osy maqsattar úshin tarıftik stavkalardy Reseıdiń Novorossıısk, Ýst-Lýga porttary arqyly dástúrli marshrýttar boıynsha tasymaldaýmen «teńestirý» maqsatynda kólik shyǵystaryn sýbsıdııalaýdy engizý talap etiledi. Memlekettik qoldaý retinde kelesi jyly saýda flotynyń teńiz kemelerin satyp alý kezinde «bıýdjettik kredıt berý» tetigin engizý máselesin pysyqtaý josparlanýda«, - dep atap ótedi mınıstrlikten.
Teńizde júzý qaýipsizdiginiń deńgeıin arttyrý aıasynda kelesi jyly Naırobı konventsııasyn ratıfıkatsııalaý boıynsha memleket ishindegi rásimder aıaqtalady. Sondaı-aq, Aqtaý portynda kemeler qozǵalysyn basqarý júıesin jáne teńizdik qutqarý-úılestirý ortalyǵyn qurý jobalaryn iske asyrý máseleleri pysyqtalady.
»Ózen júk tasymaldaryn damytý maqsatynda kelesi jyly Ertis ózeni boıynsha Reseımen ekijaqty tasymaldardy ulǵaıtý jáne Qytaımen mýltımodaldyq qatynasty uıymdastyrý josparlanyp otyr. Tutastaı alǵanda, 2025 jylǵa qaraı júk tasymaldarynyń 1,6 mln tonnadan 3,8 mln tonnaǵa deıin ósýi boljanýda«, - dedi mınıstrlikten.