Bıyl aqmolalyq dıqandar 5,2 mln gektar jerge dán sebýdi josparlap otyr
Basqarma basshysynyń aıtýynsha, kóktemniń kelýimen, dıqandar úshin de eń jaýapty kezeń bastaldy. Osy oraıda, kóktemgi egis naýqanyn tıimdi ýaqytta júrgizip, sapaly ónimge qol jetkizý úshin bar kúshti, óndiristik jáne kadrlyq áleýetti jumyldyrý kózdelgen.
«Ótken jyly kóktemgi dala jumystarynyń jáne oraq naýqany uıymshyldyqpen ótkizilip, zamanaýı tehnologııalardyń engizilýiniń arqasynda oblystyń agrarshylary ónimdi gektaryna 11,6 tsentnerden aınaldyryp rekordtyq 5,3 mıllıon tonna ónim alǵanyn atap ótkimiz keledi. Jyl qorytyndysy boıynsha oblysta aýyl sharýashylyǵy jalpy óniminiń kólemi 1 mlrd teńgenden asty, bul respýblıka boıynsha eń úzdik kórsetkishterdiń biri. Aýyl sharýashylyǵynyń negizgi kapıtalyna ınvestıtsııalardy tartý 97,3 mlrd teńgeni, tamaq ónimderin óndirýge ınvestıtsııalar 24,5 mlrd teńgeni qurady. Aýyl sharýashylyǵy óniminiń eksporty 432,2 mln AQSh dollaryna jetti. Bıyl oblys dıqandary 5,2 mıllıon gektardan astam alqapqa dán sebýdi mejelep otyr», - dedi Qasym Itqusov.
Sonymen birge, basqarma basshysy óńirde aýyl sharýashylyǵy tehnıkasy kóktemgi egis naýqanyna 100 paıyz daıyn ekenin atap ótti.
«Bıyl egis naýqanyna 15,1 myń traktor, 16,6 myń sepki, 1,5 myń ónimdiligi joǵary egis keshenderi jumyldyrylady. Oblysta aýyl sharýashylyǵy tehnıkasynyń parkin jańartý jáne qazirgi zamanǵy tehnıkalarmen qamtamasyz etý boıynsha aýqymdy jumystar júrgizilýde. Máselen, jyl basynan beri 16,7 mlrd teńgege 366 birlik tehnıka satyp alyndy. Osy rette, memleket tarapynan sharýalarǵa jańa tehnıka satyp alýy úshin 25 paıyzǵa ınvestıtsııalyq sýbsıdııa qarastyrylǵan», - dep túıindedi Qasym Itqusov.
Aıta ketsek, budan buryn Qosshyda 65 mln teńgeniń jer ýchaskesi memleketke qaıtarylǵanyn jazǵan edik.