Bıyl Aqmola oblysynda 14,3 myń bala mektep tabaldyryǵyn attaıdy

KÓKShETAÝ. QazAqparat – Aldaǵy oqý jylynda Aqmola oblysyndaǵy 542 mektepke 137 myńnan astam oqýshy barady. Bul týraly jýrnalıstermen ótken brıfıngte oblystyq Bilim basqarmasynyń basshysy Shoqan Orazalın aıtty, dep habarlaıdy QazAqparat tilshisi.

Basqarma basshysynyń málimetinshe, qazirgi kezde oblys mektepterin jańa oqý jylyna daıyndaý boıynsha belsendi jumys júrgizilýde.

«Jańa 2023-2024 oqý jylynda Aqmola oblysyndaǵy 542 mektepte 137 myńnan astam oqýshy bilim alatyn bolady, onyń ishinde 14395 bala birinshi synypqa barady», - dedi Shoqan Orazalın.

Foto: Bilim basqarmasy

Basqarma basshysy atap ótkendeı, mektepterdi pedagog kadrlarmen qamtamasyz etý – ótkir másele. Osy rette, oblystyń bilim berý uıymdarynda pedagogıkalyq qyzmetti 23 myńnan astam ustaz júzege asyrady (mektepke deıingi uıymdarda – 3645, orta bilim berý uıymdarynda – 16039, qosymsha bilim berý uıymdarynda – 1069, arnaıy uıymdarda – 464, tehnıkalyq jáne kásibı bilim berý mekemelerinde – 1917).

«Pedagogterdi jumysqa ornalastyrý kezinde aıqyndyq pen ashyqtyqty qamtamasyz etý maqsatynda 2021 jylǵy jeltoqsannan bastap pedagogterdi bilim berý uıymdaryna qabyldaý konkýrs boıynsha júzege asyrylady.

Foto: Bilim basqarmasy

Memlekettik bilim berý uıymdarynyń pedagogterin qyzmetke taǵaıyndaý jáne qyzmetten bosatý tártibi mınıstrlik buıryǵymen bekitilgen.

Bıyl bilim berý uıymdaryna 154 maman keldi. Pedagogtardy qabyldaý jalǵasýda.

Qazirgi ýaqytta oblys ákiminiń granty esebinen 346 adam «pedagogıka» mamandyǵy boıynsha bilim alyp jatyr. 2023 jyly 79 maman dıplom alyp shyqty, olarǵa oblystyń bilim berý uıymdaryna joldama berildi», - dedi basqarma basshysy Shoqan Orazalın.

Aıta ketsek, budan buryn Aqmola oblysynda 17 508 bala materıaldyq qoldaýǵa muqtaj ekenin jazǵan edik.