Bıyl Aqmola oblysynda 10 ındýstrııalyq joba iske qosylady
Bıyl óńirde kásipkerlikti qoldaý Kartasy aıasynda 1,9 myń jumys ornyn qura otyryp, 144,8 mıllıard teńgege 10 jobany iske qosý josparlanǵan. Olardyń ishinde Býrabaı aýdanyndaǵy jyldyq qýaty 5 mıllıon tonna altyn óndirý fabrıkasy, jyldyq qýaty 25 myń tonna bolatyn Makınsk qus fabrıkasynyń úshinshi kezeńi sııaqty birqatar iri jobalar bar.
Oblystyq kásipkerlik jáne týrızm basqarmasynyń basshysy Erbol Ospanovtyń aıtýynsha, ekonomıkalyq belsendiliktiń draıveri ınvestıtsııalardyń ósýi bolyp tabylady.
«2010 jyldan bastap iske qosylǵan IIDMB jobalarynyń arqasynda temirbeton qubyrlar, sferalyq podshıpnıkter, sırek kezdesetin metaldar, keshendi bıotyńaıtqyshtar, alkogolsiz sýsyndar, bıg-beg tıpti qaptar, tsement, aýyl sharýashylyǵy jáne kommýnaldyq tehnıka tárizdi buryn oblys aýmaǵynda shyǵarylmaǵan jańa ónimderdiń óndirisi jolǵa qoıyldy» - dep atap ótti Erbol Ospanov.
Aıta ketsek, ótken jyly óńirde Indýstrııalandyrý kartasy aıasynda jalpy ınvestıtsııa kólemi 790,1 mıllıard teńgeni quraıtyn 9 joba iske qosylyp, 564 jańa jumys orny quryldy.
Olardyń qatarynda jyldyq qýaty 5 mıllıon tonna ken óńdeıtin altyn óndirý fabrıkasy, jyldyq qýaty 6 myń tonnany quraıtyn qus fabrıkasy, jyldyq qýaty 30 mıllıon dana keramıkalyq kirpish shyǵaratyn zaýyt, qýaty 25 MVt jáne 7 MVt bolatyn 2 jel elektr stantsııasy, jyldyq qýaty 700 birlik traktor qurastyratyn zaýyt, kartop óńdeý fabrıkasy, shujyq ónimderin óndirý kesheni, bıe sútin qaıta óńdeý kesheni jáne qymyz daıyndaý sııaqty jobalar bar.
Baǵdarlamany iske asyrý bastalǵannan beri kásipkerlikti qoldaý kartasy sheńberinde iske qosylǵan kásiporyndar 2021 jyly óndirilgen ónerkásiptik ónimniń jalpy kóleminiń 55,1 paıyzyn óndirdi.
Aıta ketsek, jalpy, oblysta 2010 jyldan bastap 428,8 mıllıard teńgege 110 astam joba júzege asyryldy.