Bıyl AI-92 markaly benzındi eksportqa shyǵaramyz - Bozymbaev
QR Energetıka mınıstri Qanat Bozymbaevtyń aıtýynsha, qazirdiń ózinde munaı ónimderiniń profıtsıti baıqalady. Rezervte AI-92 markaly benzınniń kólemi 316 myń tonnany qurap otyr. Bul naqty suranystan bir jarym esege artyq. Al Shymkent munaı óńdeý zaýyty tolyǵymen iske qosylǵannan keıin artyq janar-jaǵarmaıdyń kólemi arta túsedi. Sol kezde rezervtiń kólemi 560 myń tonnadan asady.
«Sol sebepti bizge munaı ónimderin eksportqa shyǵarýǵa týra keledi. Ázirshe, eksport jabyq. Reseımen aradaǵy kelisim de bar. Endi, ony ózgertý kerek. Biz Reseıdegi áriptesim ekeýimiz (osy eldiń energetıka mınıstri Aleksandr Novak - avt.) únemi baılanystamyz. Ókinishke qaraı, mamyrda tıisti kelisimdi rásimdeı almadyq. Atalǵan qujatqa sáıkes, biz ortaq naryqty basqasha retteýdi kózdeımiz. Sonyń nátıjesinde qazaqstandyq munaı ónimderine eksportqa jol ashylady. Endi, Reseıde saılaý boldy jáne taǵysyn taǵy. Sodan kelisimdi rásimdeı almadyq. Maýsymda atalǵan qujatty rásimdeımiz degen úmit bar. Qyrkúıektiń aıaǵyna deıin Parlamentten ótkizip alsaq, qazan-qarasha aıynda eksport ashylady», - dedi Q.Bozymbaev búgin qoǵamdyq keńestiń otyrysynda.
Mınıstrdiń sózine qaraǵanda, jazda reseılik benzındi temirjolmen jetkizýge tyıym salý josparlanyp otyr. Sebebi onsyz da otandyq janar-jaǵarmaıdyń kólemi jetkilikti. «Shymkent munaı óńdeý zaýytynyń modernızatsııasy aıaqtalǵanda dızeldi otyn jaǵynan da ózimizdi tolyǵymen qamtamasyz ete alamyz. Al maýsym aıynda avıakerosındi sertıfıkattaýdy aıaqtasaq, ishki suranys tolyǵymen óteledi. AI-92, AI-95, dızel otyn men avıakerosın boıynsha eshqandaı qıyndyq bolmaıdy. Esterińizde bolsa, atalǵan jumys 2013 jyly bastalǵan bolatyn. Mine, bes jyldyń ishinde ishki naryqty otandyq munaı ónimderimen qamtamasyz etý mindetin oryndap otyrmyz», - dep atap kórsetti Q.Bozymbaev.
Aıta keteıik, búgingi keńeste Q.Bozymbaev munaı óndirý kólemine qatysty boljam jasady. Onyń aıtýynsha, Qazaqstanda munaı óndirý kólemi 104 mln tonnaǵa jetetin bolady. Jaqyn arada Qazaqstan ishki naryqty otandyq janar-jaǵar maımen tolyǵymen qamtamasyz ete alady. «Bıyl Shymkent munaı óńdeý zaýytyn jańartý jumystary aıaqtalady. Sosyn munaı óńdeý zaýyttaryn jyl saıyn jóndeý ýaqyty 45 kúnnen 20 kúnge deıin qysqartý týraly sheshim qabyldandy. Endi, 45 kúndik jóndeý jumystary úsh jylda bir ret qana jasalady. Bunyń barlyǵy jóndeý jumystaryn basqarýdyń avtomatty júıesi aıasynda atqarylady. Atalǵan júıeni biz aǵymdaǵy jylda engizetin bolamyz. Al jóndeý merzimi qysqarǵannan keıin munaı óńdeý kólemi artady. Aldaǵy ýaqytta biz ishki naryqty tolyǵymen otandyq janar-jaǵar maımen qamtamasyz ete alamyz», - dep atap kórsetti Q.Bozymbaev. Budan bólek, tórtinshi munaı óńdeý zaýytynyń texnıkalyq-ekonomıkalyq negizdemesi ázirlenip jatyr. Kúzde jańa zaýyttyń qaı jerde ornalasatyny belgili bolady.