Bıyl 8800 nysanda múgedek jandarǵa arnalǵan pandýs máselesi sheshiledi

NUR-SULTAN. QazAqparat – Elimizde múgedek jandarǵa jaǵdaı jasap, qozǵalys qaýipsizdigin qamtý máselesi kún tártibine qaıta engizildi. Bul týraly QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat tilshisi.

«Elimizdegi pandýs máselesin sheshe alamyz. Árıne, ózekti másele. 2015-2018 jyldar aralyǵynda qoǵamda múgedek jandardyń qaýipsiz qozǵalysyn qamtamasyz etýge qatysty aýqymdy shara ótkizdik. Ol sharýaǵa múgedek jandar da tartyldy. Atalǵan shara aıasynda 30 myńǵa jýyq mekemeniń máselesi sheshildi. Olardyń deni áleýmettik mekemeler, ıaǵnı dúken, dárihana, jumyspen qamtý ortalyǵy jáne taǵy basqa. Pandemııaǵa baılanysty sońǵy 2 jyl boıy atalǵan másele boıynsha baqylaý báseńdep ketti. Jýyrda Atyraý, Taraz qalasynda bolyp, qoǵamdyq uıymdardyń ókilderimen kezdesip, múgedekterge jaǵdaı jasaý máselesin kóterdik. Qoǵam belsendileri biraz jaıtty kóterip, usynystaryn aıtty», - dedi Tamara Dúısenova «Qazaqstan» ulttyq telearnasynda bolǵan «Jedel jeli» baǵdarlamasynyń efırinde.

Mınıstrdiń aıtýynsha, bıyldan bastap qoǵamda múgedek jandarǵa jaǵdaı jasaý máselesi qaıta qolǵa alynady.

«Bizde arnaıy jol kartasy bar. Soǵan sáıkes bıyl jospar boıynsha 8800 nysanda múgedek jandardyń qozǵalysyna jaǵdaı jasalýy tıis. Sonymen qatar bul sharýaǵa jergilikti ákimdikter jáne jeke mekelerdiń de jaýapkershiligi bar», - deıdi ol.

Buǵan deıin vedomstvo basshysy elimizde «ıAndeks Taksı» júrgizýshilerine áleýmettik jarna tólenetini týraly habarlaǵan edi.