Bıyl 800-ge jýyq tarazdyq kópbalaly jáne turmysy tómen otbasy baspanaly bolady

TARAZ. QazAqparat – Búgin tańda Taraz qalasynda 18 887 adam úı kezeginde tur. Jyl sońyna deıin 765 turmysy tómen jáne kópbalaly otbasy pátermen qamtamasyz etiledi,- dep habarlaıdy QazAqparat tilshisi.

Aǵymdaǵy jyly Taraz qalasynda «Nurly jer» baǵdarlamasy boıynsha 15-shi shaǵynaýdanda 3025 páterdi quraıtyn 54 kópqabatty turǵyn úıdiń qurylysy bastalǵan bolatyn. Jospar boıynsha atalǵan úılerdiń 47-si jyl sońyna deıin tolyq paıdalanýǵa berilip bitýi qajet. Qalǵan 7 úıdiń qurylysy 2021 jylǵa ótpeli. Bul týraly Taraz qalasynyń ákimi Aıtqazy Qarabalaev habarlady.

«Aldaǵy ýaqytta 15-shi shaǵynaýdandaǵy qurylys jumystary tolyqtaı aıaqtalatyn bolsa, onda 8 myń 500 otbasyna arnalǵan 190 kópqabatty úı paıda bolady. Qazirgi tańda onda 35 turǵyn úıdiń qurylysy aıaqtalǵan. Sonymen qatar, 2019 jyldan ótpeli 16 turǵyn úıdiń qurylysy jalǵasýda. Budan bólek, 10 arendalyq jáne 9 kredıttik turǵyn úılerdiń qurylysy júrip jatyr»,-dedi shahar basshysy.

Sondaı-aq, atalǵan memlekettik baǵdarlama aıasynda, aldaǵy ýaqytta qaladaǵy «Avtobeket» aýmaǵyndaǵy 100 gektarda 14-shi shaǵynaýdany boı kótermek. Onda 5 331 otbasyna arnalǵan 5 qabatty 33 úı, 9 qabatty 27 úı jáne 12 qabatty 5 turǵyn úı salý josparlanyp otyr. Qazirgi tańda atalǵan alqap gaz jáne baılanys jelilerimen qamtamasyz etilse, jylýmen qamtý jumystary aǵymdaǵy jyly aıaqtalatyn bolady. Jalpy mundaǵy ınjenerlik ınfraqurylymdardyń qurylys jumystaryn keler jyly tolyǵymen aıaqtaý josparlanýda.