Bıyl 80-ge jýyq arheologııalyq joba iske asyrylady

ASTANA. QazAqparat – Bıyl 79 arheologııalyq joba iske asyrylady. Bul týraly Premer-Mınıstrdiń orynbasary Altaı Kólginovtiń Májilistiń taratylǵan 7-shaqyrylym depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Elimizde arheologııalyq qazba júrgizý tártibi «Tarıhı-mádenı mura obektilerin qorǵaý jáne paıdalaný týraly» zańynda aıqyndalǵan. Mádenıet jáne sport mınıstrligi quqyq qorǵaý organdary men ákimdikter bul salada zańnamanyń saqtalýyn qatań qadaǵalaıdy. Zańnyń 33-babyna sáıkes arheologııalyq jumys ýákiletti organ bekitken arnaıy jospardyń negizinde júzege asady. Arheologııalyq qazbany jospardan tys júrgizýge tyıym salynǵan. Jospar memlekettik organdardyń usynysy negizinde bir jylǵa jasalady. 2022 jyly respýblıka boıynsha 68 arheologııalyq qazba júrgizilse, 2023 jyly 79 arheologııalyq jobany iske asyrý kózdelgen», - deıdi Altaı Kólginov.

Onyń aıtýynsha, atalǵan zańnyń 12-babyna sáıkes arheologııalyq jumysty júrgizý qyzmeti lıtsenzııalanady.

Lıtsenzııa alýǵa úmitker uıymda mindetti túrde tájirıbeli ǵalymdar men mamandar jumys isteýi tıis.

Lıtsenzııany jergilikti atqarýshy organdarmen kelise otyryp, ýákiletti organ beredi.

«Búgingi kúni arheologııalyq qazba júrgizýge 24 uıymnyń lıtsenzııasy bar. Qazba barysynda tabylǵan materıaldar tirkelgennen keıin memlekettik mýzeılerge tapsyrylady. Arheologııalyq izdenis aıaqtalǵannan keıin lıtsenzıat 10 kúnniń ishinde mınıstrlikke esep beredi. Zańsyz arheologııa qazbasy úshin Qylmys kodeksiniń 295-babyna sáıkes jaýapkershilik qarastyrylǵan», - dedi Úkimet basshysynyń orynbasary.