Bıyl 736 aýyldy damytýǵa 143 mlrd teńge bólindi

ASTANA. QazAqparat – Bıyl eldegi 736 aýylda 1,5 myń jobany iske asyrý úshin 143 mlrd teńge jumsalady. Bul jaıynda QR Ulttyq ekonomıka mınıstri Álibek Qýantyrov Úkimet otyrysynda aıtty, dep habarlaıdy QazAqparat tilshisi.

«2023 jyly mınıstrlik oblys ákimdikterimen birlesip 736 aýyldyq eldi mekende 143 mlrd teńge somasyna 1,5 myń jobany iske asyrýdy josparlap otyr. Onyń ishinde 102 mlrd teńgesi jalpy sıpattaǵy transfertterde eseptelip, jergilikti bıýdjetterdiń shyǵystaryna berildi», - dedi Álibek Qýantyrov.

Bul qarjy turǵyn úı-kommýnaldyq sharýashylyq salasyndaǵy 119 jobany, áleýmettik ınfraqurylymnyń 275 jobasyn, onyń ishinde 91 bilim berý, 45 densaýlyq saqtaý, 139 mádenıet jáne sport salasyndaǵy jobalardy iske asyrýǵa jáne aýylishilik joldardy jaqsartýǵa baǵyttalǵan 1,1 myń jobaǵa bólinbek.

«Memleket basshysynyń jarlyǵyna sáıkes qazirgi ýaqytta Ulttyq ekonomıka mınıstrligi QR aýyldyq aýmaqtardy damytýdyń 2023-2027 jyldarǵa arnalǵan tujyrymdamasynyń jobasyn ázirledi. Sondaı-aq agroónerkásip keshenin, kásipkerlikti, aýyl sharýashylyǵy kooperatsııasyn damytý arqyly aýyl halqynyń tabys deńgeıin arttyrý kózdelgen», - dedi mınıstr.