Bıyl 7 ákimdik turǵynúıqurylysjınaq júıesi baspanalarynyń qurylys qarqynyn údetýi tıis - Úkimet otyrysy

ASTANA . 14 qańtar. QazAqparat - Qazaqstan óńirleriniń 7 ákimdigi bıyl turǵynúıqurylysjınaq júıesi arqyly salynatyn baspana boıynsha qurylys qarqynyn údetýi tıis. Bul týraly búgin «Qoljetimdi baspana-2020» baǵdarlamasyn júzege asyrý máselesine arnalǵan Úkimet otyrysynda Óńirlik damý mınıstri Bolat Jámishev málim etti.

Osy oraıda bekitilgen kesteden qalys kele jatqan óńirler máselesine toqtalǵan mınıstr, salynbaǵan úılerdiń eleýli kólemi Mańǵystaý oblysyna tıesili ekenin jetkizdi. Bul óńirdegi Aqtaý qalasynda «Aqqý» shaǵyn aýdanynyń qurylysy jobalyq sheshimderdiń oryndalmaýy sebebinen toqtatylǵan. Osyǵan baılanysty 2011 jyly oblysta turǵyn úıler tıisti deńgeıde paıdalanýǵa berilmedi. Budan bólek, taǵy 6 óńirdiń ákimdikteri bıylǵy jyly ótken jyldardaǵy qurylys qarqynynyń qalys qalýynan bolǵan kemshilikterdiń ornyn toltyrý boıynsha tıisti sharalar qabyldaýlary qajet. Máselen, Atyraý oblysynda kesteden qalyp qoıý kórsetkishi 82,4 paıyz, BQO - 98,1 paıyz, Qaraǵandy oblysy - 64 paıyz, Pavlodar oblysy - 51 paıyz, Astana 67 paıyz jáne Almaty 62 paıyz deńgeıinde. Budan buryn habarlanǵandaı, B. Jámishev Mańǵystaý oblysynan basqa nesıelik baspanany tapsyrý boıynsha jyldyq jospardy barlyq ákimdikter oryndady degen bolatyn. Alaıda, ótken jyldardaǵy bekitilgen kesteden qalyp qoıǵan qurylys qarqynyn tolyǵymen qamtý múmkin bolmady. Osyny eskere otyryp jospardy oryndaý 74 paıyzdy qurady.