Bıyl 600-ge deıin qazaqstandyq «Bolashaq» stıpendıattary bolýy múmkin

ASTANA. QazAqparat - Aǵymdaǵy jyly 600-ge deıin qazaqstandyq «Bolashaq» stıpendıattary bolýy múmkin. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.

«Bıyl Respýblıkalyq komıssııanyń sheshimimen 600-ge deıin stıpendııa bólindi. Ekonomıkalyq jaǵdaıǵa baılanysty stıpendııa kólemi ózgerip turýy múmkin. Alaıda, bıylǵa shekti kólem - 600 stıpendııa»,-dep toqtaldy ol.

Nyǵymetovtiń sózine qaraǵanda, ótken jyldardaǵy statıstıka boıynsha «Bolashaq» baǵdarlamasyna ortasha alǵanda jyl saıyn 2 myńnan sál astam adam qujat tapsyryp, konkýrstyq bes kezeńnen ótedi.

«Ár jylda básekelestik árqıly boldy. Bıyl bir orynǵa básekelestik joǵary bolatyny anyq»,-dep atap ótti ol.

Qazirgi kezde «Bolashaq» stıpendııasy ıegerleriniń jalpy sany 11 myńnan asty. 8 myń stıpendıat shetelde oqýlaryn bitirip, Qazaqstan ekonomıkasynyń barlyq salalarynda jumys isteýde. «Solardyń 48 paıyzy memlekettik mekemeler men kompanııalarda qyzmet etýde. Eki jarym paıyzy ulttyq kompanııalarda jumys isteýde. 225 túlegimiz ulttyq kompanııalarda top-menedjer qyzmetinde»,-dedi ol.

Ǵ. Nyǵymetovtiń sózine qaraǵanda, 11 paıyzy halyqaralyq kompanııalar men uıymdarda jumys istep jatyr.