Bıyl 500-den astam shaǵyn bıznes nysanynyń nesıe tóleý merzimi uzartylǵan
«Qarjy naryǵyn retteý jáne damytý agenttiginiń aqparaty boıynsha, bıyl Memleket basshysynyń 2021 jylǵy 1 sáýirdegi tapsyrmasyn oryndaý úshin vedomstvo tóraǵasynyń 2021 jylǵy 9 sáýirdegi «Shaǵyn jáne orta bıznes sýbektileriniń qaryzdary boıynsha tólemderdi keıinge qaldyrý tártibin bekitý týraly» № 127 buıryǵy qabyldandy», - dep jazdy Álıhan Smaıylov depýtattyq saýalǵa bergen jaýabynda.
Bul jerde áńgime ShOB nysandaryna 2021 jylǵy 1 sáýirge deıin, jeke kásipkerlerge 2021 jylǵy 1 sáýir men 30 maýsym aralyǵynda berilgen kredıtter týraly bolyp otyr.
«Keıinge qaldyrý merzimi ShOB sýbektisiniń tańdaýy boıynsha 30-dan 90 kúnge deıin boldy. Qaryz alýshynyń ótinishinde tólemderdi keıinge qaldyrýdyń ózge merzimi kórsetilýi múmkin. Keıinge qaldyrý kezeńinde qaryz alýshyǵa qatysty talap-aryz jumysy, merzimi ótken bereshekti óteý qajettigi týraly habarlama, sondaı-aq kredıtordyń komıssııalyq jáne ózge de tólemderdi alýy toqtatyldy», - dedi Premer-Mınıstrdiń birinshi orynbasary.
Aıtýynsha, 2021 jyly ekinshi deńgeıli bankterge 603 qaryz alýshy ShOB sýbektileriniń qaryzy boıynsha tólemderdi keıinge qaldyrý týraly ótinish bergen.
«Onyń ishinde 553 ShOB sýbektisi 9,7 mlrd teńge somanyń nesıe tólemin keıinge qaldyrýǵa múmkindik aldy. Mıkroqarjy uıymdaryna 131 ShOB sýbektisinen ótinish túsip, 95 nysannyń 105,8 mln teńge kólemindegi nesıe tóleminiń ýaqyty shegerildi» - dep jazdy Álıhan Smaıylov.