Bıyl 490 mln teńge qolma-qol aqshany áýe reısteri arqyly Astanadan zańsyz alyp ketpek bolǵan

ASTANA. QazAqparat - Astana qalasy boıynsha Memlekettik kirister departamentiniń «Áýejaı-Astana» keden beketiniń qyzmetkerleri 2022 jyldyń basynan beri qolma-qol aqsha qarajatyn deklaratsııalamaı nemese zańsyz alyp ketýdiń 55 faktisin anyqtady, dep habarlaıdy QazAqparat.

Memlekettik kirister komıtetiniń málimetinshe, deklaratsııalanbaǵan qolma-qol aqsha somasy 498 454 908 teńgeni qurady. Atap aıtqanda 1 083 599 AQSh dollary, osy buzýshylyqtar boıynsha aıyppul somasy 1 700 000 teńgeden asty.

«Mysal keltirsek, 9-qyrkúıek kúni Nursultan Nazarbaev halyqaralyq áýejaıynda Dýbaıǵa baǵyttalǵan áýereısimen ketip bara jatqan jolaýshylar kedendik baqylaýdan ótkennen keıin «Áýejaı-Astana» keden beketiniń qyzmetkerleri áýejaıdy tekserý qyzmetkerlerimen birge Qazaqstan azamatyn toqtatty. Ustaý kezinde deklaratsııalanbaǵan aqsha qarajaty anyqtaldy, atap aıtqanda 56 750 AQSh dollary. Zań buzýshy aqshanyń bir bóligin aıaq kıiminiń ultaraǵynyń astyna, al qalǵan bóligin qol júgine jasyrǵan», - dep jazdy vedomstvodan.

25-tamyz kúni Dýbaıǵa baǵyttalǵan halyqaralyq áýereısimen ketip bara jatqan jolaýshylar kedendik baqylaýdan ótkennen keıin Qazaqstan azamatyn toqtatyldy. Ustaý kezinde deklaratsııalanbaǵan 14 100 AQSh dollary anyqtalǵan.

Eske sala keteıik, «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» el Prezıdentiniń 2022 jylǵy 14 naýryzdaǵy № 830 Jarlyǵy bar. Onda 10 myń AQSh dollary balamasynan asatyn jáne Ulttyq Bankiniń áketý kúnine belgilengen baǵamy boıynsha eseptelgen somadaǵy qolma-qol shetel valıýtasy men shetel valıýtasyndaǵy aqsha quraldaryn; Ulttyq Bank shyǵaratyn 5, 10, 20, 50 jáne 100 g affınırlengen altyn quımalaryn jáne «ALTYN BARYS» altynynan, «KÚMIS BARYS» kúmisinen jasalǵan ınvestıtsııalyq monetalardy, sondaı-aq 100 g-dan astam affınırlengen altyndy shekaradan asyrýǵa tyıym salynǵan.

Osyǵan baılanysty shetelge shyǵýdy josparlaǵan azamattar Qazaqstan Respýblıkasynyń qoldanystaǵy zańnamasyn saqtaýy kerek.

Vıdeodan alynǵan kadr