Bıyl 405 adam sýǵa ketti - ıÝrıı Ilın

NUR-SULTAN. QazAqparat – Bıyl elimizdiń sý aıdyndarynda 134 bala qaza tapty. Bul týraly Májilistegi azamattyq qorǵaý júıesine qatysty Úkimet saǵatynda Tótenshe jaǵdaılar mınıstri ıÝrıı Ilın málim etti, dep habarlaıdy QazAqparat tilshisi.

«Elimizde halyqtyń shomylý, demalý jáne balyq aýlaý úshin paıdalanatyn 50 myńnan astam sý aıdyny bar. Osy sý aıdynynyń az ǵana bóligi baqylanady jáne bizdiń bólimshelerimizdiń jaýapkershilik aımaǵynda ornalasqan. Shomylý maýsymynda BAQ arqyly halyqpen aldyn alý jumystary jandandyrylady, sý aıdyndaryndaǵy demalys oryndarynda reıdter, patrýldeý júrgiziledi, sý aıdyndarynyń jekelegen ýchaskelerinde mobıldi qutqarý beketteri qoıylady. Shomylýǵa tyıym salynǵan oryndarda tyıym salatyn jáne eskertý belgileri (6 836) ornatylady. Bıyl elimizdiń sý aıdyndarynda 405 adam (onyń ishinde 134 bala) qaza tapty, bul 2020 jylmen salystyrǵanda 5,1 % - ǵa tómen. Alaıda balalar óliminiń ósýi 20,7% - dy qurady», - dedi ıÝ. Ilın.

Onyń aıtýynsha, balalardyń sýdaǵy ólimi erekshe alańdaýshylyq týǵyzyp otyr. Olardyń óliminiń sebepteri - balalardy qaraýsyz qaldyrý jáne jetkinshekterdiń bos ýaqytyn uıymdastyrýdyń bolmaýy.

«Sý aıdyndarynda qaza tapqandardyń 97%-ǵa jýyǵy TJM qutqarý bólimsheleri joq jabdyqtalmaǵan oryndarda bolady. TJM kúshimen 337 adam qutqaryldy, onyń ishinde 64-i bala. Asa qaýipti ýchaskelerde 59 maýsymdyq mobıldik qutqarý beketi qoıyldy», - dedi mınıstr.