Bıyl 400 myń sharshy metr baspana turǵyzý mindeti tur – SQO ákimi

PETROPAVL. QazAqparat – Soltústik Qazaqstan oblysynda ekonomıkanyń negizgi salalarynda oń ósim bar. Óńirde ónerkásiptiń, ınvestıtsııa tartýdyń jáne baspana salýdyń ósý qarqyny respýblıkalyq ortasha kórsetkishten joǵary, dep habarlaıdy QazAqparat tilshisi.

SQO ákimi Qumar Aqsaqalov áleýmettik jelidegi paraqshasynda 2021 jyldyń qorytyndysy shyǵarylǵanyn jazdy.

Óńir basshysynyń aıtýynsha, koronavırýs indeti, qurǵaqshylyq pen qurylys materıaldarynyń qymbattaýy sııaqty qıyndyqtarǵa qaramastan, 12 aıda oblys ekonomıkasynyń negizgi salalarynda ósim saqtalǵan.

«Óńirde ónerkásiptiń, ınvestıtsııa tartýdyń jáne baspana salýdyń ósý qarqyny respýblıkalyq ortasha kórsetkishten joǵary. 2021 jyly ónerkásip salasyndaǵy ósim 105,8 %-dy qurady. Bir jylda óndirilgen ónim kólemi 315 mlrd teńgeden 365 mlrd teńgege deıin ósti. Bizdiń zaýyttar tapsyrystar portfelin 30 %-ǵa kóbeıtip, 58 mlrd teńgege jetkizdi. Aýyl sharýashylyǵynda ındeks kólemi 87,9 % qurady. Buǵan qurǵaqshylyq áser etti. 2020 jylǵa qaraǵanda astyqtyń kólemi tómen bolǵanymen, bıdaı men maıly daqyldarǵa degen joǵary baǵanyń arqasynda jaǵdaıdy túzeı aldyq», - dep jazdy Qumar Aqsaqalov.

SQO - ınvestorlar úshin tartymdy. SQO ákiminiń aıtýynsha, bul ınvestıtsııanyń ósimin 110,1 % -ǵa jetkizýge múmkindik berdi.

Barlyǵy 332 mlrd teńge ınvestıtsııa tartyldy. Aıta ketý kerek, jeke ınvestıtsııanyń úlesi - 83 %, bul - jaqsy kórsetkish.

«Qurylys salasynda 105,8 %-ǵa ósim bar, kólemi 107 mlrd teńgeni qurady. Bul qurylys jáne jóndeý jumystarynyń barlyq túrin qamtıdy. Turǵyn úılerdi paıdalanýǵa berý 114,7 %-ǵa ósti. 2021 jyldyń basynda biz 340 myń sharshy metr baspana salý mindetin qoıdyq, naqty 351 myń sharshy metr turǵyzyldy. Bıylǵy jospar - 400 myń. 50 bıýdjettik jáne kommertsııalyq úıdiń qurylysyn jalǵastyramyz jáne bastaımyz», - deıdi SQO ákimi.