Bıyl 4,8 myń kópbalaly otbasy pátermen qamtylady - Marhabat Jaıymbetov

NUR-SULTAN. QazAqparat - Bıyl 4 835 kópbalaly otbasy turǵyn úımen qamtamasyz etiledi. Bul týraly QR Indýstrııa jáne ınnovatsııalyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov aıtty, dep habarlaıdy QazAqparat tilshisi.

«2019 jyly jyldyq 2 paıyzben jeńildetilgen kredıt beretin «Baqytty otbasy» baǵdarlamasy iske qosyldy. Kópbalaly, tolyq emes otbasylardyń jáne múgedek balalary bar otbasylardyń osy baǵdarlama boıynsha bastapqy jáne qaıtalama naryqtardan turǵyn úı satyp alýǵa múmkindigi bar. 2019 jyly 5 myńnan astam otbasy turǵyn úı jaǵdaılaryn jaqsartty. Osy jyly 49,1 mlrd teńge bólindi jáne 4900 otbasy qoldaýmen qamtamasyz etiletin bolady. Qazirgi kezde «Turǵyn úı qurylys jınaq bankine» 4769 ótinish túsip, onyń ishinde 4074 otbasyna qaryz berildi», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, tabysy bir eń tómengi kúnkóris deńgeıinen asatyn kezekte turǵan halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úı salynady.

«Jyl saıyn jalǵa beriletin 3 700 páter salýǵa jáne satyp alýǵa 32,8 mlrd teńge bólý kózdelgen. Bıyl 4 222 halyqtyń áleýmettik jaǵynan osal tobyn turǵyn úımen qamtamasyz etemiz», - dedi Marhabat Jaıymbetov.