Bıyl 3 myńǵa jýyq atyraýlyq múgedek shıpajaıda tegin emdeldi

ATYRAÝ. QazAqparat – Bıyl úsh myńǵa jýyq atyraýlyqqa kýrorttyq shıpajaıǵa tegin joldama berildi. Olar joldamany áleýmettik qyzmetter portaly arqyly alǵan, dep habarlaıdy QazAqparat tilshisi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetov málimetinshe, áleýmettik qyzmetter portalynda 60-tan astam shıpajaıdyń tizimi bar.

«Bıyl Atyraý oblysy ákimdiginiń qoldaýymen І toptaǵy múgedekter men erekshe balalarǵa, olardyń jeke kómekshilerine 14 kúnge shıpajaıǵa joldama berildi. Tegin joldamanyń baǵasy 55 aılyq eseptik kórsetkish kólemin quraıdy. Áleýmettik qyzmetter portalynan múgedektigi bar barlyq toptaǵy azamattar ózderiniń elektrondy tsıfrlyq qoltańbasy arqyly úıden shyqpaı-aq joldama alý múmkindigin paıdalanady. Olarǵa aýdandyq jumyspen qamtý bólimderi men okrýg ákimdikterindegi ózine-ózi qyzmet kórsetý buryshynyń mamandary kómek beredi», -deıdi Azamat Mámbetov.

Áleýmettik qyzmetter portaly arqyly tańdaǵan shıpajaıyna tegin joldama alǵannyń biri – Naýryzbek Shákıev.

«Buryn shıpajaıǵa tegin joldama tek ózime ǵana beriletin edi. Al, kútýshige joldamany óz qarajatymyzǵa alyp keldik. Endi bıyl jeke kútýshime de shıpajaıǵa joldama birge berildi. Buryn qarajattan qysylǵan kezde 14 kúnge eseptelgen emniń jartysyn ǵana alýǵa májbúr boldyq. Bıyl oblystyq ákimdiktiń qoldaýymen shıpajaıdaǵy emdik protsedýralardy tolyq aldym», -deıdi І top múgedegi Naýryzbek Shákıev.

Eske sala ketelik, budan buryn Atyraýda tize jaraqatynan júre almaı qalǵan 9 jasar qyzdyń tusaýy kesilgenin jazǵan edik.