Bıyl 252 qazaqstandyq oqýshy halyqaralyq olımpıadalarda júlde alǵan

ASTANA. QazAqparat - Bıyl 252 qazaqstandyq oqýshy negizgi pánder boıynsha halyqaralyq olımpıadalarda medal jeńip aldy. Bul týraly QazAqparat Oqý-aǵartý mınıstrligine silteme jasap habarlaıdy.

Jas daryndar el qorjynyna 45 altyn, 78 kúmis, 129 qola medal ákeldi. Olar matematıkadan qashyqtan ótken halyqaralyq Azııa-Tynyq muhıty olımpıadasy, matematıkadan halyqaralyq «Jibek joly» olımpıadasy, matematıkadan Balqan olımpıadasy, hımııadan oqýshylar arasyndaǵy halyqaralyq Mendeleev olımpıadasy, fızıkadan Azııa olımpıadasy (APhO), mamandandyrylǵan mektepterdiń oqýshylaryna arnalǵan matematıka, fızıka jáne ınformatıkadan Halyqaralyq Jáýtikov olımpıadasy sııaqty bedeldi qurlyqtyq olımpıadalarda Qazaqstannyń namysyn qorǵady.

«Osy jyly halyqaralyq pándik olımpıadalarǵa qatysýshylar sany 600 oqýshyǵa deıin jetti. 27 oqýshymyz ótken jyldardyń rekordyn jańartyp, eń bedeldi 7 halyqaralyq olımpıadada, atap aıtqanda, IMO, IPhO, IBO, IOL, IchO jáne t.b. olımpıadalarda júldeli oryndarǵa ıe boldy. Oqýshylarymyz osy olımpıadalarǵa qatysý tarıhynda alǵash ret 73 mln teńgeden astam syıaqy aldy. Sondaı-aq olarǵa otandyq joǵary oqý oryndarynda oqý úshin granttar berildi. Kelesi jyly balalarǵa osyndaı qoldaý kórsetiletin olımpıadalar tizimi 7-den 14-ke deıin artady», - dedi Orta bilim berý komıtetiniń tóraǵasy Gúlmıra Kárimova.

Altyn medal alǵan oqýshy 1 500 AEK, kúmis medal úshin 1 000 AEK, qola medal úshin 500 AEK kóleminde aqshalaı syıaqy alady.

Sondaı-aq oqýshylardy jarysqa daıyndaǵan ustazdarǵa da birjolǵy syıaqy berildi.