Bıyl 24 mln gektar alqaptan aýyl sharýashylyǵy daqyldary jınalady

ASTANA. QazAqparat – Búginde el boıynsha barlyǵy 2,4 mln gektar dándi jáne dándi-burshaqty daqyldar jınaldy. Bul týraly Úkimet otyrysynda Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Aǵymdaǵy jyly qolaıly aýa raıy jaǵdaılary egin jınaý jumystaryn ýaqtyly bastaýǵa múmkindik berdi jáne búgingi kúni respýblıka boıynsha barlyǵy 2,4 mln gektar nemese 14,1 paıyz dándi jáne dándi-burshaqty daqyldar jınaldy. Ortasha ónimdiligi gektaryna 11,5 tsentner bolyp, 2,8 mln tonna astyq bastyryldy», - dep baıandady mınıstr.

Erbol Qarashókeevtiń málimetinshe, búginde elimizdiń barlyq óńirlerinde egin jınaý jumystary júrip jatyr.

«Aǵymdaǵy jyly aýyl sharýashylyǵy daqyldary jınalatyn jalpy alań 24 mln gektardy quraıdy. Bul 2022 jylmen salystyrǵanda 651,8 myń gektarǵa kóp. Qazirgi tańda onyń 17,4 mln gektarynan dándi daqyldar jınalady», - dep málim etti vedomstvo basshysy.