Bıyl 23,1 mln gektar alqapqa egin egiledi

NUR-SULTAN. QazAqparat – Bıyl Qazaqstan boıynsha egis alqaby 23,1 mln gektar aýmaqty qamtıdy. Bul týraly QR Aýyl sharýashylyǵy birinshi vıtse-mınıstri Aıdarbek Saparov Úkimet otyrysynda aıtty, dep habarlaıdy QazAqparat tilshisi.

«Ákimdikterdiń derekterine sáıkes 2022 jylǵa arnalǵan egis alqaptarynyń boljamdy qurylymy qalyptasty. Osylaısha, jalpy egis alańy 23,1 mln gektardy quraıdy. Bul 2021 jyldyń kórsetkishinen 125 myń gektarǵa artyq», - dedi ol.

Mınıstr orynbasarynyń málimeti boıynsha, óndiristi ártaraptandyrý jáne birtekti daqyldardan ketý bıyl da jalǵasqapq. Osyǵan baılanysty bıdaı alańy 368,1 myń gektarǵa azaıady.

«Jem-shóp daqyldarynyń alqaby edáýir ulǵaıtylyp, 3,6 mln ga qurady. Sonymen qatar, kókónis daqyldarynyń shamaly ósýi baıqalady, baqsha daqyldary 2 myń gektarǵa tómendedi», - degen mınıstrlik ókili jergilikti ákidikterge qaıyryldy.

«Ákimdikterden nazar aýdarýdy suraımyn. Eske sala ketsem, Úkimettiń maqta men kúrish sııaqty sýdy kóp qajet etetin daqyldardyń alqaptaryn azaıtý týraly tapsyrmasy bar.

Alaıda Túrkistan oblysynda maqta alqaptary 5 myń gektarǵa ósimi baıqalady. Onyń negizgi sebebi 2021 jylǵy satyp alý baǵasynyń 2020 jylǵa qaraǵanda 220 myń teńgege artyq bolýy (tonnasyna 350 myń teńge).

Kúrish boıynsha alqap kólemi 6,5 myń gektarǵa azaıyp, 89,9 myń gektar egiletin bolady.

Qyzylorda jáne Túrkistan oblystarynyń ákimdigi aldaǵy kezeńde ońtústik óńirlerdi sý resýrstarymen qamtamasyz etý jónindegi Ekologııa mınıstrliginiń boljamyn eskere otyryp, tıisti jumys júrgizýi qajet.

Maıly daqyldar boıynsha alqaptar 61,7 myń gektarǵa azaıady dep boljanýda. Sonymen qatar bul zyǵyr, maqsary jáne qysha sııaqty daqyldar, kúnbaǵys alqaptary ulǵaıtyldy.

Qant qyzylshasy sııaqty áleýmettik mańyzdy mádenıettiń josparlanǵan kórsetkishteri tómendeıdi. Esterińizge sala keteıik, Qazaqstannyń qyzylsha qant salasyn damytý jónindegi jol kartasy Úkimettiń baqylaýynda», - dedi Aıdarbek Saparov.