Bıyl 18,3 trln teńge kóleminde negizgi kapıtalǵa ınvestıtsııa tartý mindeti tur

ASTANA. QazAqparat –2023 jyly ındýstrııa salasynda bıyl 1 trln teńgege 170 jańa ınvestıtsııalyq jobany iske qosý josparlanyp otyr. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy QazAqparat tilshisi.

Álıhan Smaıylov atap ótkendeı, bıyl ekonomıkaǵa 18,3 trln teńge kóleminde negizgi kapıtalǵa ınvestıtsııa tartý mindeti tur. Jalpy quny 28,1 trln teńgege 873 jobadan turatyn ınvestıtsııalyq pýl pysyqtalyp jatyr.

«Sonymen qatar, sheteldik kásiporyndardy relokatsııalaý aıasynda 24 kompanııa Qazaqstanǵa kóshti, taǵy 43 kompanııa boıynsha jumys jalǵasyp jatyr», - dedi Úkimet basshysy.

Onyń sózine qaraǵanda, ındýstrııa salasynda bıyl 1 trln teńgege 170 joba iske qosylady. Osynyń esebinen 15 myńǵa jýyq jańa jumys ornyn ashý josparlanǵan.

Budan bólek Premer-Mınıstr munaı-gaz salasynda Teńiz kenishinde Saǵalyq qysymdy basqarý jáne Bolashaq keńeıtý jobalaryn iske asyrý jalǵasyp jatqanyn aıtty. Qarashyǵanaqta 5-shi kompressordyń qurylysy bastaldy. Qarashyǵanaqta qýaty jylyna 4 mlrd tekshe metr bolatyn taýarlyq gazdy daıyndaý jobasy pysyqtalyp jatyr.

Sonymen qatar, Qashaǵan ken ornynda jalpy qýaty 1 mlrd tekshe metrden asatyn gaz óńdeý zaýytynyń qurylysy jalǵasyp keledi. Munymen qosa, qýaty 4 mlrd tekshe metr bolatyn taǵy bir gaz óńdeý zaýytyn salý máselesi pysyqtalyp jatyr.