Bıyl 17 myń jumyskerdiń eńbek quqyǵy qorǵaldy
«2020 jylǵy qańtar-mamyr aılarynda memlekettik eńbek ınspektorlary 2 myńnan astam eńbek quqyǵynyń buzýshylyǵyn joıdy. 17 myń jumyskerdiń jalpy somasy 1,7 mlrd teńgeden astam jalaqy bereshegi óteldi», – dedi Birjan Nurymbetov Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.
Sondaı-aq ol sheteldik jumys kúshin tartatyn 95 kásiporynǵa tekserý júrgizilip, 1 myńnan astam túrli zań buzýshylyqtar joıylǵanyn aıtty.
«Taǵy bir mańyzdy másele - eńbekti qorǵaý men qaýipsizdikti qamtamasyz etý. Qazaqstanda 2019-2023 jyldarǵa arnalǵan eńbek jaǵdaılary zııandy jumys oryndary men óndiristik jaraqattanýdy tómendetý jónindegi jol kartasy iske asyrylýda. 14,7 myń óndiristik keńes quryldy jáne eńbekti qorǵaý boıynsha 2,3 myń standart engizildi. Jumyskerlerdiń qaýipsiz eńbek jaǵdaılaryn qamtamasyz etý sharalaryna 116 mlrd teńge jumsaldy. Sońǵy 4 jylda qabyldanǵan sharalardyń nátıjesinde óndiristik jaraqattanýdyń tómendeýiniń oń serpini baıqalady. Mysaly 2016 jyly 1683 adam zardap shekse, 2019 jyly ol 1431-ge deıin azaıdy», - dedi mınıstr.
Birjan Nurymbetov eńbek qatynastary salasynda áleýmettik seriktestik belsendi damyp kele jatqanyn atap ótti. Atap aıtqanda, 126 myń kásiporyn ujymdyq shart jasasty. Onyń ishinde iri jáne orta kásiporyndar 94,7 paıyzdy quraıdy. 137 myń kásiporyn jumys oryndaryn saqtaý jóninde memorandým jasady. 205 myń kásiporyn jalaqysy tómen 1,2 mln jumysshylardyń jalaqysyn 32,7 paıyzǵa kóterdi.
Sondaı-aq, ol osy jylǵy 14 mamyrda «Qazaqstan Respýblıkasynyń keıbir zańnamalyq aktilerine Eńbek máseleleri boıynsha ózgerister men tolyqtyrýlar engizý týraly» Zań kúshine engenin eske saldy.
Qujat eńbek sharttaryn esepke alýdyń biryńǵaı júıesine jumyskerdiń eńbek qyzmeti týraly aqparatty engizý arqyly kadrlyq is júrgizýdi tsıfrlandyrýdy; jumys berýshilerdiń olarǵa laıyqty eńbek jáne turmys jaǵdaılaryn jasaý jónindegi mindetteri men jaýapkershiligin belgileýdi; jumys berýshiniń eńbek shartyn birjaqty tártippen buzý quqyǵyn boldyrmaýdy; merzimdi áskerı qyzmet ótkerý kezeńinde azamattardyń jumys ornyn saqtaýdy; qyzmetkerlerdiń quqyqtary men múddelerin qorǵaý úshin kásipodaq qozǵalysyn yntalandyrý jáne kásipodaqtardyń rólin arttyrý maqsatynda kásipodaqtardy qurý tártibin qaıta qaraýdy kózdeıdi.