Bıyl 15 mln sharshy metr turǵyn úı paıdalanýǵa beriledi

ASTANA. QazAqparat – 2023 jyly elimizde 15,3 mln sharshy metr turǵyn úıdi paıdalanýǵa berý josparlanyp otyr. Bul týraly QR Premer-Mınıstri Álıhan Smaıylov málim etti, dep habarlaıdy QazAqparat tilshisi.

«Turǵyn úı-kommýnaldyq ınfraqurylymdy damytýdyń áleýmettik jáne ekonomıkalyq mańyzy zor. Respýblıka boıynsha 2029 jylǵa deıin 111 mln sharshy metr turǵyn úıdi paıdalanýǵa berý qajet. Ótken jyly 130 myńnan astam otbasynyń turǵyn úı máselesin sheshildi. Osylaısha turǵyn úıdi paıdalanýǵa berý byltyrǵy jospary oryndaldy. Degenmen 2021 jylmen salystyrǵanda turǵyn úılerdi paıdalanýǵa berý qarqyny birshama tómendedi. Bıyl 15,3 mln sharshy metr turǵyn úıdi paıdalanýǵa berý josparlanyp otyr», - dedi Álıhan Smaıylov Úkimet otyrysynda.

Onyń aıtýynsha, turǵyn úılerge qatysty basty problemanyń biri qajetti ınfraqurylymnyń bolmaýy.

«Mysaly, elordada ınfraqurylym men energoresýrstardyń jetispeýinen aldaǵy jyldary turǵyn úı salý kólemi birshama azaıyp otyr. Memleket basshysy úı qurylysyn josparlaǵanda ınjenerlik ınfraqurylymdy keshendi túrde damytý qajettigin basa aıtty», - deıdi Úkimet basshysy.