Bıyl 15,5 mln tonna bıdaı bastyryldy - Erbol Qarashókeev

ASTANA. QazAqparat – Elimizdiń birqatar óńirinde bıdaı jınaý aıaqtaldy. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Bıyl aýyl sharýashylyǵy daqyldarynyń jalpy jınaý alańy 23,4 mln gektardy qurady. Onyń ishinde astyq jınaý alańy - 16,1 mln gektar. Osy jyldyń qolaıly jaǵdaıy egin jınaý naýqanynyń kóp bóligin úzilissiz ótkizýge múmkindik berdi. Nátıjesinde búgingi kúni respýblıka boıynsha barlyǵy 15,4 mln gektar dándi jáne dándi-burshaqty daqyldar nemese jalpy egin jınaý alańynyń 96,3 paıyzy jınaldy. Ortasha túsim gektaryna 13 tsentner kóleminde 20,1 mln tonna astyq bastyryldy», - dedi mınıstr.

Onyń dereginshe, 2021 jyly ortasha túsim gektaryna 9,8 tsentnerden aınalyp, 14,9 mln tonna ónim alyndy. Bıylmen salystyrǵanda 25,9 paıyzǵa az bolǵan edi.

Aqtóbe, Qaraǵandy oblystarynda jáne Shymkent qalasynda dándi daqyldy jınaý tolyǵymen aıaqtaldy.

«Eger daqyldar, onyń ishinde áleýmettik mańyzy bar daqyldar bólinisinde qaraıtyn bolsaq, onda jınalatyn bıdaı alańy 12,9 mln gektardy quraıdy. Onyń 12,6 mln gektary nemese 98,1 paıyzy jınaldy, túsimdiligi gektaryna 12,4 tsentner shamasynda 15,5 mln tonna bastyryldy. Aqtóbe, Shyǵys Qazaqstan, Jambyl, Jetisý, Batys Qazaqstan, Qaraǵandy, Qyzylorda, Túrkistan oblystarynda jáne Shymkent qalasynda bıdaı jınaý aıaqtaldy. Qalǵan oblystarda aıaqtalý satysynda», - dedi Erbol Qarashókeev.