Bıyl 148 aýyl taza aýyz sýǵa qol jetkizedi

NUR-SULTAN. QazAqparat – Bıyl elimizde 148 aýyl ortalyqtanyrylǵan sýmen jabdyqtaý jelisimen qamtylady. Bul týraly QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.

«Elimizde jalpy 6 316 aýyl bar. Onyń ishinde 3 991 aýyl ortalyqtandyrylǵan sýmen jabdyqtaý jelisimen qamtamasyz etilse, 403 aýylda keshendi blok-modýlder ornatylǵan. Qamtylmaǵan 1 922 aýyldyń 793-ine ortalyqtandyrylǵan sýmen jabdyqtaý jelisin salýdy jalǵastyrý josparlanyp otyr. Al 1 129 aýylda sý tazalaý derbes jelisi ornatylatyn bolady. Bıyl 148 aýyl ortalyqtandyrylǵan sýmen jabdyqtaý jelisimen qamtamasyz etiledi jáne turǵyndary az 220 aýylda keshendi blok-modýlder ornatylady», - dedi ol Májilistegi dóńgelek ústel barysynda.

Birinshi vıtse-mınıstrdiń dereginshe, 2021-2024 jyldarǵa arnalǵan respýblıkalyq bıýdjetten 181 mlrd teńge qoldaý tapqan. Bul qarajat 284 aýyldy ortalyqtandyrylǵan sýmen jabdyqtaý jelisimen qamtamasyz etýge múmkindik beredi.

«Buǵan qosa, 20,6 myń turǵyny bar 56 aýylda Ekologııa, geologııa jáne tabıǵı resýrstar mınıstrligi jelisi arqyly aýylishilik sýmen jabdyqtaý jelisin salý jalǵasady. Qarajatty tıimdi jumsaý maqsatynda 200-den az adamturatyn 1 129 aýylda sý tazalaý jelisi ornatylatyn bolady», - dedi Qaıyrbek Óskenbaev.