Bıyl 140 aýylda ınternet sapasyn jetildirý jumystary júrgiziledi – Baǵdat Mýsın

NUR-SULTAN. QazAqparat - 2021 jyly Qazaqstannyń 628 eldi mekeninde Internet sapasy jaqsartyldy. Bıyl taǵy da 140 aýylda osyndaı jumystar júrgizilmek. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın óziniń Facebook paraqshasynda jazdy, dep habarlaıdy QazAqparat.

«Keshe Memleket basshysy Qasym-Jomart Toqaevqa mınıstrliktiń byltyrǵy atqarǵan jumystarynyń qorytyndysy, Prezıdent tapsyrmalarynyń júzege asyrylýy, tsıfrlandyrý jáne IT salasynyń damý perspektıvasy jóninde esep berdim.

Osy baǵyttaǵy jumystarǵa toqtalsaq, eń qajetti 18 qujatty tsıfrlyq nusqaǵa aýystyrdyq, 2021 jyly bul qyzmetterdi 32 mln adam alǵan. Jeke derekterdi qorǵaý sharalaryn mindetti túrde saqtaı otyryp, memlekettik tsıfrlyq servısterdi syrtqy platformalarǵa shyǵaryp jatyrmyz (mysaly, Kaspi/Halyk). Byltyr 70 mln onlaın qyzmet kórsetilgen, sonyń ishinde 20 mln #eGovMobile qosymshasy arqyly usynyldy»,-dedi mınıstr.

Onyń aıtýynsha, Prezıdent tapsyrmasyna sáıkes uıaly baılanys operatorlaryna qatysty baqylaý sharalaryn kúsheıtý jáne baılanys sapasyn ólsheýdiń jańa algorıtmderin qoldaný arqyly «tsıfrlyq teńsizdikti» joıý jumystary júrip jatyr. 2021 jyly 628 eldi-mekende Internet sapasy jaqsartylsa, bıyl taǵy da 140 aýylda osyndaı jumystar júrgizilmek.

«Mobıldi operatorlarmen birge Nur-Sultan, Almaty, Shymkent qalalarynda 5G tehnologııasyn synaqtan sátti ótkizdik. 2022 jyly respýblıkalyq mańyzy bar qalalarda, 2023-2024 jyldary oblys ortalyqtarynda osy jumystardy kommertsııalyq maqsatta iske qosý josparlanyp otyr.

Demonopolızatsııa boıynsha. «Qazaqtelekom» kompanııalar toby baılanys operatorynyń biri básekelestik ortaǵa shyǵarylady. Sondaı-aq básekelestik ortany jaqsartýǵa baǵyttalǵan birqatar zańnamalyq bastamany qabyldaý boıynsha jumystar atqarylyp jatyr.

IT salasy boıynsha. Prezıdentke Astana Hub tehnoparkiniń jumysy, sonyń ishinde Qazaqstanǵa kelip jatqan sheteldik IT kompanııalar týraly aıttym. Prezıdent otandyq IT sektordy qoldaýǵa baǵyttalǵan naqty sharalar ázirleýdi jáne halyqaralyq naryqta jetistikke jetken sheteldik IT kompanııalarǵa kómek kórsetýdi tapsyrdy.

Tsıfrlandyrýdyń platformalyq úlgisine ótý boıynsha. Osyndaı jobalardy júzege asyrýda tájirıbesi bar sarapshylardy tarta otyryp, Govtech platformasyn «UAT» AQ, qazaqstandyq ІT-mamandardyń kúshimen qurýdy usyndym»,-dedi Baǵdat Mýsın.