Bıyl 14 myń tonnadan astam balyq óndirildi - mınıstr Brekeshev

ASTANA. QazAqparat - Elimizde 10 aıda 14 myń tonnadan astam balyq óńirildi. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«10 aıda balyq ósirýshiler 14 myń tonnadan astam balyq ósirdi. Jospar boıynsha - 22,6 myń tonna. Bul rette Almaty, Qaraǵandy jáne Atyraý oblystary boıynsha ındıkatorlardan aýytqý bar. Jalpy, baǵdarlama ındıkatorlaryna qol jetkizý úshin ákimdikter bıznes sýbektileriniń bastamalaryn qoldaýdy kúsheıtýi qajet. Bul turǵyda jergilikti bıýdjetten memlekettik qoldaý kórsetý mańyzdy. Bul rette, osy jyly ákimdikter sýbsıdııalaýǵa 401 mln teńge nemese baǵdarlamanyń belgilengen kórsetkishteriniń 17 paıyzy qarastyrylǵan. Memleket tarapynan bıznesti qoldaý jónindegi mindettemelerdi oryndaý úshin ákimdikter jyl saıyn tıisti kólemde qarajat kózdeýi qajet», - dedi mınıstr Balyq salasyn damytý baǵdarlamasynyń bıylǵy qorytyndysyn baıandaı kele.

Onyń dereginshe, búginde 1 600 sý aıdyny 1 200 sharýashylyq sýbektisine bekitildi. Onda 12 myńnan astam adam balyq aýlaýdy kásip etip otyr.

«Sonymen qatar 72 kásiporyn balyq óńdeýmen aınalysady. Onyń 17-si joǵary talaptarǵa saı keledi jáne Eýropalyq odaq elderine balyq ónimderin eksporttaý quqyǵyn aldy. Qalǵandary ishki naryq pen jaqyn shet elderge baǵdarlanǵan», - dedi Serikqalı Brekeshev.