Bıyl 120 myńnan astam qazaqstandyq tegin tehnıkalyq, kásiptik bilim ala alady
«Prezıdenttiń tapsyrmasyna saı kolledjderde bilim alý boıynsha memlekettik tapsyrys kólemi artady. Bıyl 120 myńnan astam qazaqstandyq tegin tehnıkalyq jáne kásiptik bilim ala alady. Bul 2021-2022 oqý jylymen salystyrǵanda 25 myńǵa kóp. Sonymen qatar kásiporyndardyń kolledjderdi sheftik qamqorlyqqa alý tájirıbesin damytyp, dýaldy bilim berýdi keńeıtý kózdelip otyr», - dedi Sholpan Karınova mınıstrliktiń keńeıtilgen alqa otyrysynda.
Sonymen qatar ol Memleket basshysynyń daryndy balalardy qoldaý jónindegi tapsyrmasyn iske asyrý aıasynda mınıstrlik zańnamaǵa engiziletin túzetýlerdi daıyndaǵanyn atap ótti.
«Olar halyqaralyq pán olımpıadalarynyń júldegerlerine joǵary oqý oryndaryna UBT-syz, ıaǵnı konkýrstan tys negizde bilim alý úshin granttar berýdi kózdeıdi. Bastysy biz halyqaralyq olımpıadalardyń jeńimpazdary men júldegerleri jáne olardy daıarlaǵan pedagog- jattyqtyrýshylarǵa da birjolǵy aqshalaı syıaqy tóleýdi qarastyrdyq. Altyn medal ıegerlerine — 1500 AEK, kúmis medal – 1000 AEK, qola medal – 500 AEK kóleminde aqshalaı syıaqy taǵaıyndaý josparlanyp otyr», - dedi birinshi vıtse-mınıstr.