Bıyl 120 ındýstrııalyq joba iske qosylady

ASTANA. QazAqparat- Aǵymdaǵy jyly Indýstrııalandyrý baǵdarlamasy aıasynda 120 joba iske qosylady. Bul týraly búgin QR Indýstrııa jáne ınfraqurylymdyq damý mınıstrliginiń keńeıtilgen alqa májilisinde vedomstvo basshysy Jeńis Qasymbek aıtty, dep habarlaıdy QazAqparat tilshisi.

«2019 jyly somasy 1,1 trln teńgeni quraıtyn shamamen 120 jobanyń iske qosylýy josparlanǵan. 20 myń turaqty jumys orny qurylady», - dedi mınıstr.

Osy oraıda, ol aǵymdaǵy jyly paıdalanýǵa beriletin nysandardyń qatarynda quny 30,6 mlrd teńge bolatyn Qaraǵandy oblysyndaǵy ferrosılıtsııa, quny 6,9 mlrd teńge bolatyn Aqtóbe oblysyndaǵy keramıka taqtalaryn óndiretin zaýyttardy atady.

«Jalpy Indýstrııalandyrý baǵdarlamasyn iske asyrý kezeńinde jalpy somasy 7,9 trln teńge bolatyn 1 250-den astam joba iske qosylyp, 120 myń turaqty jumys orny quryldy. Al, 2018 jyly jalpy somasy 1,3 trln teńge bolatyn 100-den astam joba iske qosylyp, 13 myń turaqty jumys orny ashyldy», - dedi J.Qasymbek.