Bıyl 12 myń kópbalaly ana qonys toıyn toılaıdy

NUR-SULTAN. QazAqparat - Aǵymdaǵy jyly kópbalaly analarǵa 12 myń páter beriledi. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.

«Qazirgi tańda elimizde 340 myńnan astam kópbalaly analar ómir súrýde. Olarǵa memleket tarapynan kórsetiletin 93 mlrd teńgeniń áleýmettik kómegi bıyl 820 myńnan astam adamǵa beriledi. 1 toqsannyń ózinde 9 mlrd teńgeden astam qarjy bólinip, 280 myńǵa jýyq qazaqstandyq qamtyldy. Kelesi eń ózekti máselelerdiń biri - mundaı otbasylardy jumyspen qamtý. Bizdiń josparymyz boıynsha bıyl 370 myńǵa jýyq jańa jumys orny ashylýy kerek. Sonyń kem degende 85 myńy kópbalaly otbasylarǵa arnap ashylady», - dedi mınıstr.
Onyń atap ótýinshe, osy jyldyń 1 toqsanda Qazaqstanda 32 myń jańa jumys orny ashyldy. Sonyń 9 myńǵa jýyǵy kópbalaly analarǵa arnalǵan.
«Jospar boıynsha 6 myńǵa jýyq jaldamaly páter jyl saıyn kópbalaly otbasylarǵa berilip otyratyn bolady. Buǵan qosymsha taǵy 16 myń páter «Turǵyn úı qurylys jınaq banki» arqyly jeńildetilgen paıyzdyq mólsherlememmen 2019-2021 jyldary beriledi. Jalpy jeti jyldyń ishinde eń keminde 40 myńǵa jýyq jaldamaly páter berilýi kerek. Oǵan qosymsha úsh jyldyń ishinde Turǵynúıqurylysjınaqbanki arqyly jeńildetilgen zaımmen keminde 18 myń páter berilýi tıis. ıAǵnı, osy ýaqyttyń ishinde 54 myńǵa jýyq páter berilýi kerek. Onyń 12 myńy bıyl beriledi», - dedi B.Saparbaev.