Bıyl 1-4 synyptaǵy barlyq oqýshyǵa tegin ystyq tamaq beriledi

ASTANA. QazAqparat – Bıylǵy oqý jylynda el boıynsha 1-4 synyp oqýshylary tegin tamaqpen qamtylady, dep habarlaıdy qazAqparat.

«Memleket basshysynyń tapsyrmasy boıynsha bıyl 1 qyrkúıekten bastap az qamtylǵan otbasylardan shyqqan 1,5 mıllıonnan astam oqýshyny, sondaı-aq áleýmettik mártebesine qaramastan bastaýysh synyp oqýshylaryn tegin tamaqtandyrýmen qamtý josparlanǵan», - delingen Oqý-aǵartý mınıstrligi Balalardyń quqyqtaryn qorǵaý komıtetinin málimetinde.

Respýblıka boıynsha tegin tamaqtaný quny orta eseppen 577 teńgeni quraıdy, eń joǵary baǵa Almaty qalasynda – 800 teńge.

«Aldyńǵy jyldary 1-4 synyp oqýshylaryn tegin tamaqpen qamtý 56,6% qurady. Bul Astana, Almaty jáne Shymkent qalalarynyń, Pavlodar, Batys Qazaqstan, Qaraǵandy, Ulytaý, Qyzylorda jáne Atyraý oblystarynyń oqýshylary boldy.

Memleket basshysynyń tapsyrmasyn oryndaý maqsatynda qalǵan óńirlerdiń oqýshylaryn tegin tamaqpen qamtamasyz etý boıynsha jumystar júrgizildi. Osylaısha jańa oqý jylynan bastap 100% kórsetkishke qol jetkiziletin bolady», - dedi Balalardyń quqyqtaryn qorǵaý komıteti basqarmasynyń basshysy Dana Maqtaeva.

Aıtylyp ótkendeı, búginde mınıstrlik mekteptegi tamaqtaný sapasyn arttyrý máselesin pysyqtap jatyr.