Bıyl 1,1 trln teńge somasyna 149 joba iske asyrylady
«Osy jyly ónerkásipti damytýǵa baılanysty qoldanystaǵy zańnamany jetildirý jumysy jalǵastyrylady. Memleket basshysynyń tapsyrmasyna sáıkes orta jáne joǵary bólinistegi ónimderdi óndirý maqsatynda ishki naryqty elimizde shyǵarylatyn bazalyq materıaldarmen qamtamasyz etý jónindegi sharalar qabyldanady. Buǵan qosa ımportty almastyrýdyń salalyq josparlary men óńirlik baǵdarlamalary qolǵa alynady. Jyl sońyna deıin 16,3 myń turaqty jumys ornyn ashýdy qarastyratyn 1,1 trln teńge somasyna 149 jobany iske asyrý kózdelgen», - dedi Marat Qarabaev mınıstrliktiń keńeıtilgen alqa otyrysynda.
Onyń dereginshe, 2022 jyldyń qorytyndysy boıynsha 2 trln teńge somasyna 14,4 myń jumys ornyn ashýǵa múmkindik bergen 160 joba iske asyryldy.
«Aıtalyq, Qyzylorda oblysynda tabaq shyny óndirisi, Atyraý oblysynda polıpropılen shyǵaratyn, Qaraǵandy oblysynda avtomobıl shınalaryn óndiretin, sondaı-aq Shymkent qalasynda alıýmınıı qalbyryn shyǵaratyn kásiporynnyń jumysy jolǵa qoıyldy. Sonymen birge Jambyl oblysynda azot-fosfor tyńaıtqyshtaryn óndirý 2 esege ulǵaıtyldy», - dedi mınıstr.