Bıtkoın baǵasy 106 myń dollardan asyp tústi

<p>ASTANA. KAZINFORM &ndash; Bıtkoın taǵy da qun rekordyn jańartyp, 106 myń dollar sheginen asyp tústi, dep habarlaıdy Kazinform agenttiginiń tilshisi.</p>

Binance krıptobırjasynyń málimetinshe, 16 jeltoqsanǵa qaraǵan túni Máskeý ýaqytymen saǵat 03:40-ta baǵam birlik úshin 106,6 myń dollarǵa jetti. Alaıda saǵat 04:22-ge qaraı baǵa qaıtadan kóterile bastaǵanǵa deıin 105,4 myń dollarǵa deıin tómendedi. Bir táýlik ishinde krıptovalıýta quny 3,5%-dan astamǵa ósti.

Bıtkoınnyń ósýi 5 qarashada AQSh prezıdentiniń saılaý kúnimen tuspa-tus keldi. Ol kezde baǵa $68 myń boldy, sodan beri krıptovalıýta óziniń tarıhı maksımýmdaryn birneshe ret jańartty.

TradingView málimetinshe, sońǵy 24 saǵatta krıptovalıýtalardyń jalpy kapıtalızatsııasy 0,69%-ǵa ósip, 3,641 trln dollarǵa jetti. Bıtkoın 2,08 trln dollardy nemese jalpy naryq qunynyń 57%-dan sál astamyn qurap otyr.

Bıtkoın baǵasynyń ósýi basqa jetekshi krıptovalıýtalardyń ósýin yntalandyryp otyr. Mysaly, Ethereum 1,15%-ǵa qymbattady, onyń quny bir birlik úshin 4 myń dollarǵa jetti.

Sarapshylar naryqtyń aǵymdaǵy dınamıkasyn ınvestorlardyń artyp jatqan qyzyǵýshylyǵymen jáne ınvestıtsııalyq qural retinde krıptovalıýtalardyń tartymdylyǵyn arttyratyn makroekonomıkalyq faktorlarmen baılanystyryp otyr.

Osyǵan deıin aqsha aıyrbastaý oryndarynda dollar 522 – 529 teńgeden saýdalanyp jatqanyn jazdyq.