Bitimgershilik qyzmette qaı mamandyqtar suranysqa ıe

NUR-SULTAN. QazAqparat - Bitimgershilik qyzmette qaı mamandyqtar suranysqa ıe ? Bul týraly elordada BUU Bas hatshysynyń eki orynbasarymen kezdesýden keıingi brıfınge QR Qorǵanys mınıstri Nurlan Ermekbaev málim etti, dep habarlaıdy QazAqparat tilshisi.

«Kóptegen elderde bitimgershilerge degen qajettilik bar. Biraq naqty qaı elge jiberiletini júrgiziletin kelissózderge baılanysty anyqtalady. Aldaǵy ýaqytta BUU shtab ókilderimen, basshylarymen bul máseleni naqty talqylaıtyn bolamyz. Negizi, ol Azııa jáne Afrıkadaǵy elder», - dedi N. Ermekbaev.

Onyń sózine qaraǵanda, bitimgerler mamandyǵy boıynsha jasaqtalady, ıaǵnı medıtsına, saper mamandar, barlaý, ınjenerlik sala men polıtsııa baǵyttaryna tıesili.

«Búginde osy mamandyqtar qajet bolyp jatyr. Sonymen qatar, tehnıkaǵa da qajettilik bar. Mysaly, tikushaqtar, túngi kórý qurylǵylary jáne basqa da kólik túrlerine suranys baıqalýda. BUU osyndaı tehnıkany jalǵa alyp, ony paıdalanýǵa múddeli», - dedi QR Qorǵanys mınıstri.

Budan buryn habarlanǵandaı, Elordada QR Qorǵanys mınıstri Nurlan Ermekbaev BUU Bas hatshysynyń jedel qoldaý jónindegi orynbasary Atýl Hare jáne bitimgershilik operatsııalar baǵytyndaǵy orynbasary Jan-Per Lakrýamen kezdesti.

Aıta keteıik, jaqynda QR Prezıdenti Qasym-Jomart Toqaev beıbitshilik jolynda Qazaqstan men BUU yntymaqtastyǵy arta beretinin málim etken edi.

«Bitimgershilik mıssııasymen Lıvanda ıgilikti isterin tabysty aıaqtaǵan BUU-nyń alǵashqy qazaqstandyq toby aman-esen elge oraldy. Beıbitshilik pen halyqaralyq qaýipsizdik jolynda Qazaqstan men BUU yntymaqtastyǵy arta beredi», - dedi Memleket basshysy.