Bıshimbaev pen Baıjanov sottaǵy sońǵy sózin aıtty

<p>ASTANA. KAZINFORM &ndash; Kópshiliktiń nazaryn aýdarǵan atyshýly Bıshimbaevtyń soty aıaqtalýǵa jaqyn. Astana qalasynyń qylmystyq ister jónindegi mamandandyrylǵan aýdanaralyq sotynda ótip jatqan sot protsesinde búgin eki aıyptalýshy &ndash; Qýandyq Bıshimbaev pen Baqytjan Baıjanov sońǵy sózin aıtty.</p>

Qýandyq Bıshimbaev buǵan deıin alǵa tartqan faktilerdi taǵy bir márte eske salyp, Saltanat Núkenovany qatygezdikpen óltirmegenin jetkizdi.

Sóz arasynda Ekinshi dúnıejúzilik soǵys kezinde fashıstik Germanııanyń nasıhat mınıstri bolǵan Gebbelstiń «ótirik sumdyq bolǵan saıyn oǵan sený ońaı» degen pikirin qosyp, áleýmettik jeliler arqyly búkil qoǵam ózin qaralap jatqanyn atap ótti.

Ol Saltanattyń jáne óziniń týǵan-týystarynan keshirim surap, alqa bıler ádil sheshim shyǵaratynyna senim bildirdi.

«Men kinálimin. Moıyndaımyn. Biraq qasaqana óltirgen joqpyn», - dedi Bıshimbaev.

Baqytjan Baıjanov ta sottaǵy sońǵy sózin aıtyp, Saltanattyń ólimin jasyrý bylaı tursyn, ólim aýzynda jatqanyn bilmegenin alǵa tartty.

«Iá, qyzmetkerlerdi úılerine qaıtaryp, meıramhanany jaýyp, beınejazbalardy óshirýdi buıyrǵanymdy jasyrmaımyn. Biraq men sol kezde aýyr qylmys jasalǵanyn bildim be? Ant etemin. Bilmedim. Eger bilgende qylmysty jasyrý áreketteriniń eshqaısysyn jasamaıtyn edim. Saltanattyń týǵan-týystarynan taǵy da keshirim suraımyn. Jatqan jeri jaıly bolsyn», – dedi Baıjanov.

Sot protsesi 10 mamyrda jalǵasady.

Aıta keteıik, aıyptalýshy Bıshimbaev buǵan deıin de Saltanattyń óliminde óz kinám bar ekenin moıyndap, uryp-soqqanyn jasyrmaǵan.