Bishkektiń burynǵy meri qamaýǵa alyndy

BІShKEK. QazAqparat - Qyrǵyzstannyń bas prokýratýrasy Bishkektiń burynǵy meri Qýbanychbek Kýlmatovty jemqorlyq jasady dep aıyptady. Bul týraly «Kabar» agenttigi habarlaıdy.

Tergeý barysynda anyqtalǵandaı, 2014 jyly Kýlmatov Bishkek qalasynyń meri bolǵanda granttyq maqsattaǵy qarjyny zańsyz paıdalanǵan. Ol «Bishkek qalasynyń JEO-syn jańǵyrtý» jobasyn júzege asyrý aıasynda óńirdegi eki mekteptiń qurylysy úshin TBEA qytaılyq kompanııasy usynǵan 2 mln AQSh dollardy jymqyrǵan.

Osylaısha, K.Kýlmatov konkýrstyq irikteý ótkizbeı, «Alto Grýpp» JShQ basshysymen kelise otyryp, qytaılyq kompanııany 1 mln AQSh dollaryn atalmysh jeke kompanııanyń shotyna tikeleı aýdarýǵa kóndiredi. Sondaı-aq, qalalyq bıýdjetten Kalys Ordo mektebiniń qurylysyn aıaqtaý úshin qosymsha 100 mln som bólingen.

Qazirgi tańda merdiger jeke kompanııa basshylarynyń biri Qyrǵyzstan Ulttyq qaýipsizdik komıtetiniń tergeý ızolıatoryna qamaldy.
Aıyptalýshy K.Kýlmatovtyń, Bishkek qalasy merııasynyń jaýapty tulǵalary jáne jeke kompanııanyń oǵan úlestes basshylarynyń turǵylyqty mekenjaıy boıynsha tintý jumystary júrgizildi.