Bishkekti qoıý tútin tumshalady
Aýada kúıik ıisi seziledi. Shahar belsendileri bolsa, arnaıy zań jobasyn usynyp, kúrdeli máselege bıliktiń nazaryn aýdarmaqshy. Aldymen quqyq qorǵaýshylar qala ákimshiligine sotqa shaǵymdanbaq boldy. Olar shahardy qoıý tútin basqandyqtan emes, aýanyń lastanýyna qarsy sharalar qabyldamaǵany úshin narazy. Biraq zań boıynsha qala bıligi bul jaǵdaıǵa jaýapty emes bolyp shyqty. Endi belsendiler 10 myń qoltańba jınap, Bishkektiń aýasyn lastamaýǵa baǵyttalǵan zań qabyldaý úshin parlamentke aryz jibermekshi. Denıs Berdakov, belsendi:
«Árıne, aýa lastanýynyń negizgi sebebi - janarmaıdyń sapasyzdyǵy bolyp otyr. Sondaı-aq jańa qurylystar boıynsha jumysty kúsheıtý kerek. Qala nashar jeldetiletindikten, ǵımarattardy belgili bir retpen salý qajet», - deıdi belsendi Denıs Berdakov.
Alǵashynda «Qyrǵyzgıdromet» mamandary Bishkektegi aýanyń lastaný deńgeıi belgilengen mólsherden aspady dep jurtty sendirmek bolǵan. Alaıda táýelsiz saraptama zııandy bólshekterdiń úlesi shamadan tys artqanyn kórsetti. Bishkek Keneshiniń depýtattary bul máseleni úkimet deńgeıinde kóterýdi usynǵan. Taalaıbek Sagynov, Bishkek Keneshiniń depýtaty:
«Bul jóninde hattamalyq tapsyrma emes, Qyrǵyz respýblıkasynyń úkimetimen birlesip qaýly shyǵarýdy usyndym. Óıtkeni hattamalyq tapsyrma degenimiz jaı tapsyrma ǵoı. Al qaýlynyń zańdy kúshi bar», - deıdi Bishkek Keneshiniń depýtaty Taalaıbek Sagynov.
Las aýanyń saldarynan qansha adamnyń densaýlyǵy syr bergeni týraly naqty málimet joq. Biraq, dárigerlerdiń aıtýynsha, ondaı syrqattar birden biline bermeıdi. Sol sebepten bul másele sheshimin tappaǵansha, mamandar tereze ashpaýǵa keńes berip otyr. Ásirese kesh men túngi ýaqytta abaı bolǵan jón eken. Qala aýasyn tazartý úshin qarajat qajet. Qala ákimshiligi ekologııalyq aıyppul engizýdi usynyp otyr. Al kelesi jyldyń kókteminde Bishkekke suıyltylǵan gazben júretin alǵashqy avtobýstar jetkiziledi.