Bishkektegi ýchaskede saılaýshylar 100% daýys berdi

BІShKEK. QazAqparat - Qazaqstannyń Qyrǵyzstandaǵy Elshiliginiń janyndaǵy №264 ýchaskede tirkelgen saılaýshylar 100 paıyz daýys berdi, dep habarlaıdy «QazAqparat» HAA-nyń menshikti tilshisi.

Saılaý komıssııasy ókilderiniń aıtýynsha, adamdar tań atysymen saılaýǵa kóptep kele bastaǵan. Kúnniń ekinshi jartysynda ýchaskede tirkeýge alynǵan azamattardyń barlyǵy ózderi tańdaǵan kandıdatqa daýys berip úlgergen.

Saılaýshylardyń arasynda stýdentter, týrıster, bıznesmender, óner ıeleri boldy.

Eske sala keteıik, Bishkekte búgin Qazaqstannyń 102 jastaǵy halyq ártisi Aısha Abdýllına daýys berdi.

Sondaı-aq opera ánshisi Maıra Muhamedqyzy da Bishkekte daýys berdi.

Bishkektegi saılaýǵa halyqaralyq baıqaýshylar qatysty.

Avtor: Natalıa Gılt