Bishkektegi qazaqstandyqtar daýys berip jatyr

BІShKEK. QazAqparat – Búgin Qyrǵyzstanda ýaqytsha turyp jatqan qazaqstandyqtar úshin №264 saılaý ýchaskesi ashyldy. Bul ýchaske Qyrǵyzstandaǵy Qazaqstan Elshiliginde ornalasqan, dep habarlaıdy QazAqparat menshikti tilshisi.

Referendým komıssııasynyń tóraǵasy Áset Ýálıev «QazAqparat» HAA tilshisine bergen suhbatynda ýchaskege 300-den astam daýys berýshi kelýi múmkin ekenin aıtty.

Elshilik alǵashqy bolyp kelgen saılaýshylarǵa estelik syılyqtar men kádesyılar berdi. Ýchaskede birinshi bolyp Kadralıev Kýbat Baryktabasuly daýys berdi.

Bishkektegi ýchaskede halyqaralyq baqylaýshylar jumys istep otyr.

Buǵan deıin habarlaǵanymyzdaı, Japonııa men Koreıada turatyn Qazaqstan Respýblıkasynyń azamattary elimizdiń Konstıtýtsııasyna ózgerister men tolyqtyrýlar engizý jónindegi jalpyulttyq referendýmda ózderiniń daýys berý quqyǵyn alǵashqylardyń biri bolyp paıdalandy.

Sheteldegi daýys berý ýchaskeleri jergilikti ýaqytqa saı ashylyp, referendýmǵa qatysýǵa nıetti qazaqstandyqtardy qabyldap jatyr.