Bishkekte «Manas» eposynyń jańa basylymy tanystyryldy

NUR-SULTAN. QazAqparat - Búgin Bishkek gýmanıtarlyq ýnıversıtetinde latyn álipbıimen jaryq kórgen «Manas» eposy kitabynyń tanystyrylymy ótti, dep habarlaıdy QazAqparat tilshisi.

Basylym tanystyrylymyna Qyrǵyzstannyń ǵylymı jáne qoǵamdyq-saıası orta ókilderi, dıplomatııalyq mıssııa qyzmetkerleri, joǵary oqý oryndarynyń oqytýshylary men stýdentter qatysty.

«Manas» eposynyń bul basylymy 1796-1983 jyldary ómir súrgen jáne búkil ómirin qyrǵyz halqynyń ańyz-áńgimelerin jınaýǵa arnaǵan tanymal manasshy Meder Mergenbaevtyń qoljazbasy negizinde ázirlengen.

Bul qoljazbany 1993 jyly Bishkek gýmanıtarlyq ýnıversıtetiniń rektory, túrkolog-ǵalym Qadyraly Qońqabaev ýnıversıtettiń ǵylymı kitaphanasynyń qoljazbalar qoryna alǵan. Al 2018 jyldyń shildesinde Halyqaralyq túrki akademııasyna berilgen.

Kitaptyń bas redaktory - professor, Halyqaralyq túrki akademııasynyń prezıdenti Darhan Qydyráli.

Jalpy Túrki akademııasy qyrǵyz halqynyń ádebıetine, tarıhyna jáne dástúrine qatysty 20-dan astam irgeli eńbekterdi jarııa etti. Atalǵan eńbekter túrkitildes álemniń ǵylymı ıntegratsııasyn damytýǵa septigin tıgizip otyr.

Aıta keterligi, Meder Mergenbaevtyń qoljazbasy negizinde ázirlengen «Manas» eposyn Túrki akademııasy alǵash ret jarııa etip otyr. Bul kitaptyń arqasynda buǵan deıin belgisiz bolyp kelgen epostyń taǵy bir nusqasy paıda bolyp, manastaný ǵylymynyń odan ary damýyna úlken úles qosyp otyr. Epos latyn álipbıimen basylyp shyqqan.

«Meder Mergenbaevtyń «Manas» eposy kitaby manastanýdaǵy úlken oqıǵa bolǵany sózsiz. Onyń ǵylymı qundylyǵy joǵary. Sebebi, eń aldymen ol esh ýaqytta jarııalanbaǵan. Ekinshiden, onda bizge belgili ózge nusqalarda aıtylmaıtyn oqıǵalar sýretteledi. Sonymen qatar onyń kórkemdik mazmuny da baı», - dedi Bishkek gýmanıtarlyq ýnıversıtetiniń rektory Ábdildá Musaev kitaptyń tanystyrylymy barysynda.

Munan bólek, atalǵan shara aıasynda Bishkek gýmanıtarlyq ýnıversıteti men Halyqaralyq túrki akademııasy arasynda memorandýmǵa qol qoıyldy. Atalǵan qujatqa sáıkes, BGÝ Túrki akademııasynyń halyqaralyq redaktsııalyq alqasynyń quramyna kiredi.

Sonymen qatar, búgin BGÝ-de Halyqaralyq túrki akademııasynyń «Intellektýaldyq ortalyǵynyń» ashylý rásimi ótti.