Bishkekte qazaq-qyrǵyz jastar forýmy ótip jatyr

BІShKEK. QazAqparat - Qazaqstan men Qyrǵyzstannyń belsendi jastary Bishkekte ótken Qyrǵyzstan-Qazaqstan jastar forýmynda birlesken bastamalardy kóterdi, dep habarlaıdy QazAqparattyń menshikti tilshisi.

Astana dıplomatııalyq klýby men Qyrǵyz Respýblıkasy úkimeti janyndaǵy Jastar isteri, deneshynyqtyrý jáne sport jónindegi memlekettik agenti uıymdastyrǵan forýmǵa eki eldegi jastar uıymdarynyń 100-ge jýyq ókili qatysty.

Astana dıplomatııalyq klýbynyń prezıdenti Qaıyrbolat Sahmetovtiń aıtýynsha, kezdesýdi ótkizýdegi maqsat - Qazaqstan men Qyrǵyzstannyń jastar qoǵamdyq uıymdarynyń ókilderi jáne stýdentteri arasynda yntymaqtastyqty damytý, ekijaqty jobalar men baǵdarlamalardy iske asyrýǵa jaǵdaı jasaý, mádenıetaralyq dıalogty damytýdy qoldaý.

Kezdesýde «Ortalyq Azııa tsıfrlyq klýby» jáne «Ortalyq Azııa dıplomatııalyq mektebi» atty jańa jobalar maquldandy. Kezdesý qatysýshylary biraýyzdan «Bir ózen - bir taǵdyr» («Ortaq ózen - ortaq taǵdyr») birlesken ekologııalyq aktsııasyn ótkizý qajettigin aıtty.

Budan tys, qazaqstandyq qatysýshylar Prezıdent Nursultan Nazarbaevtyń 5 qazandaǵy Joldaýynda aıtylǵan 2019 jyldy Jastar jyly dep jarııalaý týraly bastamaǵa toqtaldy. Osyǵan baılanysty, búgingi forým qatysýshylary osyndaı formattaǵy kelesi kezdesýdi Astanada ótkizýdi usyndy.