Bishkekte Altaı órkenıetine qatysty konferentsııa ótip jatyr
Álemniń túkpir-túkpirinen zertteýshilerdi jınaǵan halyqaralyq alań osydan 60 jyl buryn 1957 jyly Mıýnhendegi Halyqaralyq 24-shi shyǵystanýshylar kongresinde qurylǵan edi. Altaıster konferentsııasy dástúrli túrde jyl saıyn ótkizilip keledi.
«Mundaı dástúr zertteýshiler men ǵalymdardyń altaı murasynyń mádenıeti men tarıhyn zertteýge degen zor qyzyǵýshylyǵyn kórsetedi», - dedi Qyrǵyzstannyń prezıdenti Sooronbaı Jeenbekov.
«Jyl saıynǵy halyqaralyq konferentsııa altaıst-ǵalymdar úshin Altaı órkenıetiniń tilderi men mádenıetin, murasyn zertteý barysyndaǵy sońǵy ǵylymı jańalyqtardy talqylaýǵa jáne basqa da zertteýshilermen keńinen pikir almasýǵa múmkindik beredi», - dedi Qyrǵyzstannyń el basqarýshysy.
El prezıdenti Altaı órkenıetine qatysty Pamır-Altaı, Tıan Shan taýlarynan Saıan Altaı men Enıseıge deıingi aýmaqtyń tabıǵaty, taýlary men ormandary, dalasy men ózenderi bir ekenin aıtty. Ǵalymdar úshin máńgilik kóshpendi órkenıetti zertteý - tańǵalarlyq erekshe taqyryp bolyp qala beredi. Tarıh ǵylymynda «Halyqtardyń uly kóshi» ataýymen tanymal protsestiń altaı órkenıetimen baılanysy bar ekeni belgili. Bul mádenıetaralyq almasýdy kúsheıtip, til, antropologııalyq jáne násildik ózgeristerge alyp keldi. Sondaı-aq, ǵun, túrik, qyrǵyz, mońǵol, mámlúk, tımýrıd, osman, aýstro-majar syndy jańa ımperııalar paıda boldy.
Konferentsııa 30 tamyzǵa deıin jalǵasady. Jıynnyń qorytyndysyna sáıkes, Altaı órkenıetiniń beımálim tustary týraly arnaıy jınaq shyǵarý josparlanǵan.