Bıshimbaev partııa qatarynan shyǵarylǵan joq - «Nur Otan» hatshysy
Bul týraly «Nur Otan» partııasynyń hatshysy Qanybek Jumashev aıtty , dep habarlaıdy QazAqparat.
«Eger Bıshimbaevtyń kinási sot tártibimen dáleldenetin bolsa, ony kináli dep tapsa, onda partııa qatarynan shyǵarylady. Qazirgi ýaqytta ol partııa qatarynan shyǵarylǵan joq», - dedi Qanybek Jumashev «Nur Otan» partııasy Saıası keńesiniń keńeıtilgen otyrysynan keıin BAQ ókilderine bergen suhbatynda.
Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda. Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi. 12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan. Bıshimbaev Prezıdenttiń Jarlyǵymen 2016 jyldyń 28 jeltoqsanynda mınıstr qyzmetinen bosatyldy. Ol bul laýazymda segiz aı jumys istedi. 2013 jyldyń 30 mamyrynan 2016 jyldyń 5 mamyryna deıin «Báıterek» Ulttyq basqarý holdıngi» AQ-nyń basqarma tóraǵasy boldy.
Foto:Q. Bıshimbaev/ 2014 jyl