Bıshimbaev isindegi zaýyttyń jumysshylaryna eńbekaqy taıaý kúnderi tólenedi
«Atalǵan másele boıynsha tergeý amaldary júrip jatyr. Qazir bizdiń maqsat nysannyń qurylysyn jalǵastyryp, ony ýaqtyly tapsyrýǵa baılanysty bolyp otyr. Atalǵan másele boıynsha jaqynda mınıstrlikte keńes ótti. Bul jobada «Shymkenthımmontaj» kompanııasy bas merdiger emes, bas merdiger konsortsıýmynyń qatysýshysy bolyp tabylady. Bul kompanııany aýystyrý konsortsıýmnyń sharty boıynsha ýaǵdalastyqqa eshqandaı yqpal etpeıdi. Sondyqtan da tıisti qadamdar boıynsha másele sheshilip jatyr. Meniń oıymsha, nysandy der kezinde tapsyratyn bolamyz. Budan bólek, ondaǵy jalaqy berý máselesi de taıaý kúnderde sheshilip, qurylys jumystary jandanady»,-dedi IDM Investıtsııalar jónindegi komıtet tóraǵasy Saparbek Tuıaqbaev.
Budan buryn buqaralyq aqparat quraldarynda shyny zaýytynda jumys istep jatqan qurylysshylar birneshe aıdan beri eńbekaqylaryn almaǵany habarlanǵan edi.
Esterińizge sala keteıik, «Báıterek UBH» AQ basqarmasynyń burynǵy tóraǵasy Qýandyq Bıshimbaevqa qatysty qylmysty tergeý amaldary júrip jatyr. Sybaılas jemqorlyqqa qarsy kúres ulttyq bıýrosy habarlaǵandaı, ol bir top adammen aldyn ala kelisip, birneshe ret iri kólemde para aldy dep aıyptalýda. Bıshimbaev Qyzylorda qalasynda tabaq shyny shyǵaratyn jáne óńdeıtin zaýytyn salý kezinde «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrǵan degen kúdikke ilindi. Osy oraıda ol atalǵan somanyń 2 mln AQSh dollaryn ózine alǵandyǵy tekserilýde.