Bıshimbaev: 2017 jyly JІÓ-niń naqty ósýi 1,9 paıyz deńgeıinde bolady

ASTANA. QazAqparat - 2017 jyly JІÓ-niń naqty ósýi 1,9 paıyz deńgeıinde boljanýda. Bul týraly búgin Parlament Májilisiniń jalpy otyrysynda QR Ulttyq ekonomıka mınıstri Qýandyq Bıshimbaev málim etti. Májilismender «2017-2019 jyldarǵa arnalǵan respýblıkalyq bıýdjet týraly» zań jobasyn talqylaýda, dep habarlaıdy QazAqparat.

«JІÓ-niń naqty ósýi 2017 jyly 1,9%,  2021 jylǵa qaraı 3,1% deıin ósýi boljanýda. Nomınaldy jalpy ishki ónim 2017 jylǵy 48,4 trln. teńgeden 2021 jyly 63,6 trln. teńgege deıin ósedi. Halyqtyń jan basyna shaqqandaǵy jalpy ishki ónim 2017 jylǵy 7,5 myń AQSh dollarynan 2021 jyly 10,0 myń AQSh dollaryna deıin ulǵaıady»,-dedi mınıstr.

2017- 2021 jyldardyń Áleýmettik-ekonomıkalyq damý boljamy men 2017-2019 jyldarǵa arnalǵan respýblıkalyq bıýdjet parametrleri bazalyq stsenarıı negizinde qalyptastyryldy. Osy stsenarıı boıynsha 2017 - 2019 jyldary munaı baǵasy barreline 35 AQSh dollary shamasynda jáne odan ári 2021 jyly barreline 45 AQSh dollaryna deıin ósýi konservatıvti deńgeıde alyndy. Metaldardyń baǵalary 2016 jylǵa qaraǵanda 2021 jyly 11%-ǵa deıin ósýdi kórsetedi. Munaı óndirý kólemi 2017 jyly 79,5 mln. tonnany qurap, 2021 jylǵa qaraı 86,5 mln. tonnaǵa deıin ósedi dep kútilýde.

Ónerkásip ortasha 2,1%-ǵa ósedi, onyń ishinde óńdeý ónerkásibi  2,1%-dy, taý ken ónerkásibi  2,2%-dy quraıdy. Aýyl sharýashylyǵyndaǵy jalpy ónim kóleminiń jyldyq ortasha ósimi 3,0% deńgeıinde, qurylys salasynda 3,6% deńgeıinde boljanady.