Birjan Nurymbetov Túrkistan oblysynda halyqty áleýmettik qorǵaý jumystarymen tanysty
Respýblıka boıynsha tirek-qımyl apparaty buzylǵan múmkindigi shekteýli azamattarǵa kásiptik bilim beretin birden bir mekemeni aralap kórdi.
Túrkistan oblysyndaǵy sapary aıasynda mınıstr óńirlik jumyspen qamtýdy úılestirý jáne áleýmettik baǵdarlamalar basqarmasynyń «Arnaýly kásiptik kolledjindegi» balalardyń quqyqtary men zańdy múddelerin qorǵaýdy qamtamasyz etý júıesimen tanysty. Bul mekeme memleket qamqorlyǵyna alynǵan ári jasy 15-ten asqan múgedek balalar arasynan kásiptik bilimi bar mamandardy daıarlaýmen jáne eńbek naryǵynyń talaptary men óndiris suranystaryn eskere otyryp daıarlaýdyń sapasyn udaıy jetildirý maqsatynda ashylǵan.
Kásiptik bilim berýdiń oqý baǵdarlamalaryn iske asyrýda arnaýly áleýmettik qyzmetterdiń kepildik berilgen kólemin usynýdaǵy statsıonarlyq úlgidegi uıym sanalady. Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde 2020 jyly 74 955 adam jumyspen qamtý sharalaryna qatysqan.
Onyń ishinde jappaı kásipkerlikti damytý baǵyty boıynsha 3676 adam Bıznes-bastaý jobasy aıasynda kásipkerlik negizderine oqýǵa joldandy. 1 085 adam 3 mln teńgeden bastalatyn shaǵyn nesıemen qamtamasyz etilgen. 8 myńnan asa adam 550 myń teńgeden memlekettik grant alyp, kásibin dóńgeletýde.
Atqarylǵan jumystardyń nátıjesinde aımaqta 1037 jańa jumys oryndary ashylyp otyr. Memlekettik jáne úkimettik baǵdarlamalar sheńberinde 64,3 myń jumys oryndary qurylǵan. 3761 adam kásipker retinde tirkelip, bıznespen aınalysýda. Basym bóligi, ıaǵnı 7 myńnan astam azamat mal jáne qus sharýashyly men egin sharýashylyǵyn damytýǵa kirisken. 2517 azamat halyqqa qyzmet kórsetý salasyna bet buryp, tigin, kondıter tsehy, shashtaraz, dárihana, sulýlyq salony, avtokólik jóndeý ortalyǵy, jıhaz tsehy jáne basqa salada óz kásibin damytýda.