Birjan Nurymbetov: Memlekettiń qoldaýymen 411 myń adam turaqty jumysqa turdy

NUR-SULTAN. QazAqparat – «Jumyspen qamtý 2020» jol kartasy aıasynda bıyl jumyspen qamtý boıynsha qoldaý kómegin 1 mln 200 myń adam alady. Bul týraly Úkimet otyrysynda Eńbek jáne halyqty áleýmettik qorǵaý mınıstri Birjan Nurymbetov tolyǵyraq aıtyp berdi, dep habarlaıdy QazAqparat tilshisi.

«Jumyspen qamtý jáne halyqtyń tabysyn qamtamasyz etý máselesi árqashan da basymdyqqa ıe. Jumyspen qamtýdy qoldaý jónindegi memlekettik sharalar osy jyldyń ekinshi jáne úshinshi toqsanynda jumyssyzdyq deńgeıin 5 paıyz deńgeıinde saqtap qalýǵa múmkindik berdi. Jumyssyz júrgen azamattar jumyspen qamtý ortalyqtaryna resmı túrde tirkelý belsendiligi joǵarylady», - dedi mınıstr.

Birjan Nurymbetov pandemııanyń jaǵymsyz saldaryn azaıtý maqsatynda halyqty jumyspen qamtý boıynsha sharalar kesheni qabyldanǵanyn jetkizdi.

«Osy jyly jumyspen qamtý sharalarymen 1 mln 200 myń adam qamtylady. Ol sharalar «Eńbek» jáne «Jumyspen qamtý» jol kartasy, sondaı-aq basqa da memlekettik baǵdarlamalar sheńberinde usynylǵan. Búgingi kúni 934 myń adam jumyspen qamtý sharalaryna tartyldy. Onyń 411 myńy turaqty jumysqa turdy», - dedi Birjan Nurymbetov.