Birjan Nurymbetov: 42 500 teńge alǵan jeke tulǵalar aqshany qaıtarmańyzdar, ýaıymdamańyzdar

NUR-SULTAN. QazAqparat - Jeke tulǵalardyń 42 500 teńge áleýmettik tólem alýynyń zańdylyǵy tekserilmeıdi. Bul týraly Ortalyq kommýnıkatsııalar qyzmetindegi brıfıngide QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«42 500 teńge áleýmettik tólemi proaktıvti túrde taǵaıyndalǵandar esh nárseni ýaıymdamaý kerek. Ony qaıtarýdyń da qajet joq. Búkil jeke tulǵalar, eshqaısyńyz qaıtarmańyzdar, ýaıymdamańyzdar. Tekserý de bolmaıdy. Tekserý bolǵan kúnniń ózinde eshkim sizderdiń jumysyńyzdyń bolǵanyn ne bolmaǵanyn dáleldeı almaıdy. Sondyqtan ony qaıtarýdyń qajeti joq», - dedi mınıstr.

Onyń atap ótýinshe, 42 500 teńgeni zańsyz alyp, qazirgi ýaqytta keri qaıtarǵandar týraly derek joq. Sebebi mınıstrlik áleýmettik tólemdi taǵaıyndaý, tóleýmen ǵana aınalysyp jatyr.

«Barlyǵynda bul taqyrypty toqtatýǵa shaqyramyn. Birde-bir adam 42 500 teńgege baılanysty qylmystyq jaýapkershilikke tartylmaıdy. Bul - áleýmettik tólem. Tipti qatelesken kúnniń ózinde eshqandaı jaza bolmaıdy», - dedi Birjan Nurymbetov.