Biryńǵaı jıyntyq tólemniń qoldanylý merzimi aıaqtalýǵa jaqyn

ASTANA. QazAqparat - Jýyrda keıbir BAQ «2024 jyldan bastap BJT joıylady» degen qate aqparat taratty. Osyǵan oraı Memlekettik kirister komıteti atalǵan tólem túriniń qoldanylý ýaqytyna qatysty jáne BJT tóleýshiler 2024 jyldan bastap ne isteýine bolatyny týraly málimdedi, dep habarlaıdy QazAqparat.

Biryńǵaı jıyntyq tólem (BJT) bastapqyda 5 jylǵa (2019 jyldan 2023 jylǵa deıin) ýaqytsha engizilgen. Bul tólemdi jeke kásipker retinde tirkelmegen, ózin-ózi jumyspen qamtyǵan azamattar, eger olar tek jeke tulǵalarǵa qyzmet kórsetse jáne olardyń jyldyq tabysynyń somasy 4 mln.teńgeden aspasa tóleı alatyn.

BJT engizýdiń negizgi jáne jalǵyz maqsaty - ózin-ózi jumyspen qamtyǵandardy mindetti áleýmettik medıtsınalyq saqtandyrý, áleýmettik saqtandyrý jáne zeınetaqymen qamsyzdandyrý júıelerine tartý. Sondyqtan bul tólemderi tómen jeńildik kezeńi boldy. Bul kezeń aıaqtalady.

Qazir, ózderińiz biletindeı, jeke tulǵalardyń tabystaryn deklaratsııalaý kezeń-kezeńimen engizilýde, onda tabystardyń mólsherin kórsetý qajet. Buryn kásipkerlik qyzmetti tirkemegen azamattar endi kásipker retinde tirkelip nemese jaldamaly qyzmetker bolyp jumys jasaýy kerek. Tańdaýy óz erkinde.

Jeke kásipker retinde tirkelgen jaǵdaıda tıisti salyq rejımin tańdaıdy.

Jeke qyzmetterdi kórsetý kezinde eń tıimdisi - «e-Salyq Business» arnaýly mobıldi qosymshany paıdalanylatyn salyq rejımi bolyp tabylady. Ol chek berýge múmkindik beredi, sizdiń ornyńyzǵa salyqtar men tólemderdi esepteıdi, deklaratsııa usynylmaıdy.

Bıýdjettiń tólemi alynǵan kiristen 1% quraıdy, bul jeke tabys salyǵynyń stavkasy. Jeńildikti sanattarǵa jatpaıtyn kásipkerdiń áleýmettik tólemderiniń eń tómengi somasy 14 350 teńgeni quraıdy. Bul kásipkerdiń paıdasyna jasalatyn tólemder.

Mindetti zeınetaqy jarnalary, olar bul jaǵdaıda 7 000 teńgeni quraıdy, kásipkerdiń BJZQ-daǵy jeke shotyna aýdarylady jáne onyń zeınetaqy jınaqtaryn qalyptastyrady.

Áleýmettik aýdarymdar 2450 teńgege teń, olar sondaı-aq árbir tulǵa boıynsha derbes eskeriledi jáne áleýmettik tólemderdiń mólsherin aıqyndaıdy. Mysaly, dekrettik demalysqa shyqqanda.

Mindetti áleýmettik medıtsınalyq saqtandyrýǵa jarnalar-4900 teńge. Bul qajet bolǵan jaǵdaıda medıtsınalyq mekemelerge kedergisiz júginý múmkindigi úshin tólem bolyp tabylady.

Aǵymdaǵy jyly ınternet-platformalardy paıdalana otyryp, qyzmet kórsetetin tulǵalar úshin salyq mindettemelerin oryndaýdy jeńildetý maqsatynda «platformalyq jumyspen qamtý» pılottyq jobasy iske asyrylýda. Joba sheńberinde jeke kásipker úshin salyqtardy ustap qalýdy jáne tóleýdi ınternet-platforma júrgizetin bolady.